潮人周柏豪去年「升呢」做老闆，在網上出售自家潮牌，奈何「山寨貨」不斷以賤價湧現，雖然柏豪承認難以杜絕老翻，故一直採取容忍態度，但揚言會保留追究權利。

自家潮服被老翻，柏豪反而認為代表品牌有一定知名度，相當樂觀。

身為潮人Icon的柏豪不時穿自家服裝當宣傳。

歌手周柏豪去年11月推出自家潮流品牌，實行撈過界做埋「潮老闆」，但近日在內地購物平台上卻驚現大量「老翻」，原價399港元的T恤及699港元的短褲分別以「賤價」37港元及112港元出售。柏豪昨日透過電話回應：「其實早喺推出品牌嘅一周後，已經有翻版電話殼，我有留言澄清，都有啲人驚咗間店，其餘就會保留追究權利，亦有同公司律師研究過點做，網上推出嘅翻版嘢太易整，好難杜絕。」

憑質料贈品辨別

柏豪順道教一眾「客仔」如何辨別貨品真偽：「大家要明白一分錢一分貨，（翻版貨）啲標籤又錯晒，質料又唔同，而且價錢又差咁遠，咁就要睇客人想買虛榮感定係要好質料喇！」雖然慘被「進擊的老翻」衝擊，不過當初投資逾百萬的柏豪指，短短數月已經「回晒本」：「冇市場就冇人翻啦！好多大牌子都有呢個情況出現，不過我哋嘅包裝會送禮品，呢啲嘢翻版係做唔到。」

想搵合夥人分擔

提到有粉絲指柏豪的「潮服」設計「求其」，他說：「原意係走簡約，好多大牌子都係得個Logo，好開心有人提出意見。」他又希望生意上軌道後可以「發大嚟搞」及找夥伴分擔，坦言做老闆的壓力實在太大。