名模馬詩慧（Janet）昨日回應女兒啜爆洋妞一事時語氣平靜，指女兒當時不知所措，即時致電向她求救：「我叫佢停低，你又冇做錯事，唔使逃走！錫嘴有乜大不了，我唔知點解佢咁做，但一定有佢原因。」她坦言為人父母只想子女開心：「如果一個人真心真意鍾意自己個女，在我嚟講，男女都冇分別！呢樣嘢係出自我內心。」

馬詩慧

對於曼喜的性取向，Janet透露早在兩、三年前曾問過女兒，當時回覆是「Not sure」，她說：「佢以往拍過拖，對象有男有女，嗰個外國朋友我都見過，佢哋係好朋友。呢個階段你問我佢係咪同性戀者？我唔會話Yes，有啲人係需要時間去認識自己嘅方向，好多讀女校嘅都會有咁嘅經歷，覺得有人對我好，可能係Fall in love！如果問佢，佢唔會話100%係定唔係。（擔心？）呢啲唔到父母擔心得嚟，唔想畀壓力佢，如果係真嘅話，我只可以支持，如果有人錫佢、關心佢，做父母開心都嚟唔切，唔會理係男定女！」Janet重申並非鼓吹同性戀，只想每個人活得開心，與老公王敏德想法一致，就是尊重女兒的選擇。