英皇藝人衛詩雅的生命除了演戲外，可愛的Animal亦佔着重要的一環，家有三小貓三愛犬，非常熱鬧！她不僅學寵物美容和傳心術，更以拮羊毛手作仔「複製」愛犬「林寶堅尼」和「芝麻」。

衛詩雅對小動物充滿愛心，更炮製羊毛手作仔，拮出Q版愛犬隨時跟身！

貴婦狗「芝麻」好奇湊近鏡頭，歌基「林寶」就掛住瞓，一動一靜都咁Cute！

衛詩雅

製作步驟
羊毛手作仔的現成材料在專門店有售，並附有圖解，跟足程序照做就OK！

衛詩雅提提大家，記住用針拮實毛羊定位！

在接駁位多拮幾針，咁就冇咁易甩頭甩髻喇！

製成品
衛詩雅花了不少心機拮出翻版「芝麻」和「林寶」，還特製了兩隻迷你狗玩具。

身為「動物癡」的衛詩雅甚愛錫寶貝狗「林寶堅尼」和「芝麻」，但藝人工作忙碌又不定時，為了一解與愛犬分離的相思，她學習拮羊毛製作活靈活現的Q版公仔，帶在身旁睹物思狗，更發現製作過程大有減壓之效！

詩雅笑說：「其實製作過程唔算太複雜，只係比較花時間，初學者可以喺專門店買到一包包現成嘅製作材料連埋圖解，返去跟住做就OK！整嘅時候要用針拮實啲羊毛，等佢哋變成你想要嘅形狀，我覺得一針針拮落去好減壓，有咩唔開心都可以盡情發洩出嚟！」她還用同樣方法拮出小玩具如咖啡杯等陪襯Q版「林寶」及「芝麻」，相當精緻。

因工作關係，衛詩雅經常走埠，惦掛兩隻寶貝乃人之常情，難怪自從學識羊毛手作之後，詩雅每逢出埠，如早前到非洲影寫真，都會將Q版「心肝椗」帶在身旁：「掛住佢哋就攞出嚟睇吓，又可以幫佢哋影吓相。歌基『林寶』我用咗2、3日拮成，但就畀朋友笑佢個身唔夠長、有啲怪，但我梗係覺得好可愛啦！至於『芝麻』係貴婦，啲毛好鬈，所以要將啲羊毛扭曲嚟拮，都幾花工夫。」她提醒各初學者在製作過程中要特別注意接駁口：「盡量拮多幾針，如果唔係好容易甩頭甩髻！」

為了小寶貝，衛詩雅心機、時間花盡，跑去學寵物美容原來亦是為了「芝麻」﹕「佢本來係我朋友嘅朋友嘅寵物，最終冇人照顧，我就攞咗返屋企，點知佢患有『分離焦慮症』，放佢喺美容院會勁不安同狂吠，所以我學識幫佢沖涼同剪毛，減低佢嘅焦慮囉！」

學動物傳心術

4年前她更拜師學藝，一心想學成動物傳心術，希望與寵物作心靈溝通：「點知學完返嚟覺得唔係咁Work，可能同個老師唔係咁夾啩！最近又有朋友再介紹咗個名師畀我，上網Search過佢真係好勁，日前專登去咗聽佢嘅講座，遲啲就可以去上初班，希望今次會成功啦！」

詩雅笑言計劃考取相關證書，但要過五關斬六將：「因為要考試，所以學完初班要不停咁做功課，已經叫咗好多朋友準備定佢哋啲寵物相畀我練習，我覺得能夠知道寵物諗乜，真係好有趣！」