自言患上「假後抑鬱」的蔡卓妍，昨日出席活動時自稱病情嚴重，想繼續放假，不想返工，但無奈「妹仔命」一放假便病！復工的她還被司機取笑「年初四咁嘅樣」！

阿Sa雖然「抑鬱」未愈，不過出席活動時仍「專業」地晒腿擺甫士。

阿Sa放假放到唔想返工，但仍和同場的馬天佑玩得開心。

蔡卓妍（阿Sa）農曆新年間趁有假期，與男友陳偉霆（William）拍拖蜜遊泰國，度過5日快樂時光。返港復工的她日前在微博自言患上「假後抑鬱」，昨日出席活動的她，問到抑鬱病可有痊愈？她即笑說：「未呀！非常嚴重！想繼續放假！放假去旅行先嚟病，去5日病咗3日，個人呆吓呆吓，好似冇放過！（要返工先唔病？）係啦！我妹仔命！（放假唔夠喉？）係呀！唔想返工，開工時畀司機笑我『年初四咁嘅樣』！」提到與William蜜遊泰國，她指病愈的兩天去了潛水，兩人也是首次潛水，她不肯在水中拔開氧氣罩做測試，又因不停捏鼻噴氣減耳壓，令鼻子紅得像咖喱雞！

問到可會再有假期，阿Sa說：「有嘅！原本我係趕返嚟開戲，部戲喺曼谷拍，依家要延遲，睇吓延幾多。之前因為拍戲放走咗啲Job，公司睇緊接唔接得返番。本來下星期去意大利睇時裝騷，但呢個接唔番！」稍後的假期，她計劃跟母親到芬蘭看北極光。

情人節William話事

至於明日的情人節怎樣慶祝，她說：「唔知呀！梗係等人安排，點會自己安排！會留喺香港，我會買禮物，不過未有頭緒。（William浪唔浪漫？）OK啦！（佢過往情人節表現OK？）暫時都OK嘅！」