周潤發、甄子丹及郭富城等主演的《西遊記之大鬧天宮》票房大收，老闆王海峰計劃8月開拍續集，由古天樂飾演唐三藏，而發哥和子丹正在度期，希望擦出新火花。

發哥（左起）與子丹等破冰雕，預祝總票房突破15億港元，躲避冰碎時真情流露。

周潤發

電影大收，子丹（右）與發哥當然飲得杯落！

夏梓桐得悉古天樂將演「唐僧」即大讚對方靚仔。

「愛妻號」發哥笑言要得發嫂批准，才會接拍續集。

內地票房衝破8億6千萬元人民幣（約11億港元）的《西遊記之大鬧天宮》，香港票房亦創下2,500萬元佳績，老闆王海峰於本港舉行盛大慶功宴，周潤發及甄子丹皆攜眷出席，同片的郭富城及夏梓桐等亦有到場。王海峰表示《西遊記》題材多得可信手拈來，有望8月可開拍續集，屆時會加入古天樂飾演「唐三藏」，並加入5、6名新演員。對於古仔皮膚黝黑，老闆笑說：「我可以話唐僧去取西經，紫外線太強曬黑咗，到時會去北京、橫店同一個景區取景。（今次有錢賺？）收埋呢幾日先啦！ 我佔40%。」他揚言今次成績比想像中好，預計續集會投資4億元人民幣（約5億港元）。

古仔演「黑唐僧」

發哥在發嫂相伴下受訪，問到可有興趣拍續集？他笑言要看太太是否讓他拍，因檔期已「七國咁亂」，故最重要是度期：「西片、印度片咩都有！（係咪拍得太辛苦？）子丹辛苦啲，我都係搵碌嘢撩撩吓，睇咗劇本先啦！如果場面都係攤開手『We暈暈』都得。」提到古仔將飾演唐僧，發哥即大讚對方靚仔，提到古仔皮膚黝黑，發哥笑說：「搵檸檬水漂白咪得囉！（有興趣合作？）我做玉帝佢係唐僧，一天一地都接觸唔到啦！」

子丹「睇誠意」

至於子丹大讚今次合作開心，不過提到老闆希望其片酬再便宜一點，子丹似乎很驚訝：「吓？我真係收友情價，比起收楊受成、陳德森都平，佢話收十年前嘅價，同佢講做人唔好咁貪心，睇吓時間先。（8月再開？）咁唔得，我拍《臥虎藏龍Ⅱ鐵騎銀瓶》都成個暑假，睇佢有冇誠意。（咁你會幫《臥Ⅱ》做武指？）意見會畀，但師傅（袁和平）咁叻，唔使啦！」