粵劇名伶任劍輝與白雪仙的愛徒陳寶珠與梅雪詩（阿嗲），上月為任白慈善基金完成首11場《再世紅梅記》演出後，近日繼續積極備戰，為下月移師演藝學院及四月轉戰澳門的演出作準備，與負責統籌的高太開會商量細節。纖瘦的寶珠姐為更能演繹唐滌生筆下「風度翩翩美少年」裴禹，仍自嫌不夠Fit，並緊貼潮流在家中睇韓國瘦身女王鄭多燕的MV跳潮舞Keep Fit，她說：「我有啲啲肚腩，以前朝朝落公園做柔軟體操同慢跑，但上次做完《紅樓夢》後個人懶咗，天氣凍又唔想咁早起身，到天時熱又覺得咁熱，都係唔好住，後尾發覺唔係辦法，就去咗跳拉丁舞，想出身汗，『鄭多燕』我都有跟住電視跳過，新抱仔都有一齊跳！其實啲動作唔難，又有唔同程度可以跟住跳，但跳完第二日手腳會好痠痛！」

陳寶珠（右）與梅雪詩為《再》劇Part 2積極備戰，寶珠姐更潮跟鄭多燕跳舞喼弗！

渴望減肥的阿嗲因腳傷舊患，無法跳舞減肥，但仍有獨家收身秘方，助她演繹李慧娘的「水像脂融」，她說：「我腳有勞損，唔跳得舞，惟有靠食雞餐減肥！可以雞加蘋果、雞加芝士或蔬菜，連食八日就減七、八磅，但近排有禽流感唔敢食，好在食嗰陣未有咁猖狂！依家惟有食少啲，完晒演出就去食Buffet當獎勵！」