泫雅喪食玩Bra醉跳得
韓國女子組合4minute前日完騷後到中環夜蒲，又玩又跳順便醫肚，如「饑民」上身般狂擦。成員泫雅狂隊啤，High到邊食邊跳，還伸手入上衣整理Bra帶，舉止豪邁！
泫雅舞姿誘人，盡騷激凸身材及長腿。
兩杯到肚的泫雅企起身，邊食麵邊跳舞，其後還伸手入衫整理Bra帶，作風豪邁！
警察到場查牌，全智允繼續說笑，泫雅即示意安靜。
泫雅示意安靜
泫雅（左）拿着啤酒狂隊，權昭賢掛住玩煙花。
4minute盡興離開，泫雅及全智允獲劉晨芝等開路，不時閃避鏡頭。
南智賢與場內猛男黐住坐，有講有笑。
前日4minute在亞洲博覽館完成演唱會後，旋即趕到中環夜蒲趕下場，夜店得悉五女駕到，早已安排一個角落的靚位給她們狂歡。剛完成演唱會的五女繼續保持情緒高漲，成員泫雅甫到場連櫈都未坐暖，即拿住支啤酒狂隊，非常豪氣。未幾，一碟碟香噴噴的菜餚送到面前，完騷後餓到肚都凹的五人頓時「饑民」上身，即刻開餐喪食。High到爆的泫雅連進食時間都Keep住活躍，更索性含住啖麵站起身，一隻手捧着碟麵，另一隻手則舉高揮手跳舞，邊食邊跳，坐都坐不定。反而另外四女則低頭密密食，專心醫肚。
五女擦餐飽後開始狂歡，隨音樂節拍跳舞，喪跳喪玩。當香檳送來時，成員權昭賢即上前玩煙花，笑到四萬咁口，而幾杯落肚後的泫雅「上完電」後精神十足，跳得更加落力，玩到興起的她更不顧儀態伸手入上衣整理Bra帶，認真豪邁！五女又靚又有活力，難免吸引猛男埋身，成員全智允及南智賢分別跟場內猛男有講有笑，傾得十分開心。
叫全智允收聲
至凌晨一時許，警察到店內進行查牌工作，場內音樂突然停止，不過全智允明顯未玩夠，仍然繼續傾偈，逼得泫雅立即舉起食指放埋嘴邊，示意對方安靜。等候查牌期間，呆坐的泫雅明顯等到冇癮，不時托頭及把玩手機消磨時間。
而樂基兒好友劉晨芝在Instagram上載跟4minute的場內合照，記者聯絡劉晨芝，她表示是該夜店Show Club老闆之一，跟4minute經理人很熟：「佢哋未開騷嗰陣已經講明會請佢哋過嚟玩。（離開時有人跌傷？）嗰個係佢哋啲工作人員，都睇唔到點解佢會整親，可能跌倒啩！」自言是泫雅粉絲的她又大讚偶像索爆，五女態度友善。
