朱千雪三棲の夢

前港姐季軍朱千雪自問幸運過人，未卸任已備受無綫力捧，接拍劇集、電影及做主持，首次打「天才波」參演《On Call 36小時Ⅱ》更大獲好評，零演戲經驗的她直言性格怕醜：「加拿大讀書好興用任何方法Present，有人唱歌、有人做舞台劇，我咁多年都係攞張海報，黐啲相讀啲字出嚟，其實我有Stagefright（舞台恐懼），所以對住鏡頭演戲，有人睇住真係好緊張，加上周圍望住嘅人都比我有經驗，所有人都係我前輩，嗰刻會覺得咁做啱唔啱、佢哋覺得我點呢？」

感激吳啟華

對於自己首次的表現，Tracy認為整體尚算合格，演技上還差點層次：「我會睇觀眾嘅反應、眼光，留意自己演得好唔好、對白有冇講錯、角度靚唔靚，自己仲有好多進步空間，演員係需要唔同層次，嗰陣太新唔識運用，又唔太明咩叫層次，呢啲係我最想進步，演技都會慢慢磨練得成熟啲。」

全年工作無間斷的Tracy直言無暇上堂學戲，起初甚至不懂發問，幸而認識眾多好前輩，尤其監製潘嘉德和吳啟華的影響最大，她說：「啟華哥教我最多嘢，同我最多對手戲，由第一日唔知發生咩事，到最後差啲乜嘢，都係喺佢嘅觀察下提點我，佢好主動問我有咩問題，好感激，始終好新唔敢問、怕阻住人，對住佢會舒服好多。我好有興趣同前輩傾偈，問佢哋演戲方式，每個人演戲方式都唔同，但每個人講少少畀我聽，令我覺得會搵到自己嘅方向。」

接觸過拍戲及主持工作後，「貪心」的Tracy希望向三方面發展：「三樣都鍾意，我知拍電影嘅機會難得，所以如果有機會都想繼續做埋，未做前估唔到分別咁大。呢套電影我戲份唔多，壓力都冇咁大，可以喺片場觀察吓，今次拍完對我好大幫助，啟華哥話新人需要幻想力，而電影全部用實景好真實，幫我磨練到幻想，好似撞車咁真係撞埋嚟，自不然反應好自然，呢樣嘢幫助我第時喺廠景拍劇。」

問到想跟哪位演員合作？與啟華、影帝張家輝等合作過的Tracy笑說：「呢一年嚟合作過嘅人，都係連發夢都諗唔到嘅，所以依家連發夢都唔敢，完全唔到我話事，夾唔夾、有冇火花要合作咗先知，同啟華哥合作都唔係我諗定嘅效果，我幾Enjoy呢樣嘢，所以諗定就唔好玩，冇咗幻想。」她又表示渴望與親民的周潤發合作：「因為佢好睇後輩、好好人，如果有幸同佢合作，我唔使咁緊張，因為我覺得問佢嘢，佢會好樂意地答，一個天王巨星咁好人，更加想同佢合作。」

唔介意扮醜

Tracy先在《On Call》飾演醫生，後夥拍張家輝於新片中扮女警，算是實現了其入行時做「專業人士」的夢想，不過現在她最想挑戰喜劇，並謂相信自己有幽默感：「我想做傻大姐角色，帶畀人歡樂、形象突出，亦唔介意扮醜。（哨牙？）冇問題，我唔驚影響形象，身為演員唔想畀樣嘢框住，唔想人哋覺得我淨係可以做醫生或警察，有唔同形象畀人睇反而更開心。」問到會否抗拒性感？她說：「都接受到Deep V、露背。（床戲？）劇情需要冇所謂，演員唔可以限定自己，最緊要做嗰樣嘢有嗰個效果。」她坦言特別欣賞「一代女神」鍾楚紅，並以對方為目標，希望成為一個獲認同的演員。

後記：幸運星&觀眾緣

樣子甜美的Tracy甚有觀眾緣，私下性格也爽朗活潑，難怪深得觀眾、導演和監製歡心。一般港姐出身的女藝人，起初都飾演靚女角色，但Tracy卻與眾不同，獲導演陸劍青、梁樂民睇中做女警，她也不禁反問對方原因，導演居然表示透過其選美表現，覺得Tracy很適合、很Tough！

Tracy也自言很幸運，入行以來每個機會、幫過自己的人都出於真心，她也深明前輩陳百祥的一席話：「觀眾緣可以今日嚟，聽日走。」所以Tracy一直抱住虛心學習的態度。