性感女神陳靜（DaDa）踏入馬年即「紅」運當頭！前晚她出席好友生日Party時，慘被好友棚牙撞爆頭，令其額角留下約1吋長的傷口，更需要入院縫針，難怪她驚到爆喊！

DaDa縫針後展示貼上膠布的傷口，樂觀的她並不擔心破相。

DaDa縫針後展示貼上膠布的傷口

陳靜（DaDa）昨午於Instagram上載額頭貼膠布的自拍照，並寫道：「趕去醫院縫針路上，這次真的『紅』運當頭！」網友見狀即揣測DaDa的傷只是特技化妝，豈料女神真的受傷了！原來她前晚初八出席好友生日Party時，與一大班女性朋友圍埋坐兼吹水，大家左擰右擰傾得高興之際，DaDa被身旁的高妹好友棚牙硬撼額頭，即時爆缸，不停流血，而高妹好友亦撞甩牙，亦流到一口血！貼上膠布的DaDa於昨午三時許，坐保母車到法國醫院縫針，自言未縫過針的她說：「傷口有3分1隻尾指長，尋晚我有即時敷冰，亦有睇醫生，但當時冇專科醫生在場，所以今日先入院縫針。」

流血又流淚

約兩個多小時後，DaDa步出醫院，額頭貼上膠布、一臉愁容的她坦言傷口算嚴重，亦已戒口以免留疤：「頭先有打麻醉針，我都有擔心到喊出嚟，傷口就由內縫到外，單係傷口，外面縫咗十三針，裏面縫咗好多針，好在冇毀容，都算好彩喇！反而我個Friend就慘啲，一隻門牙甩咗，另一隻門牙崩咗，要補牙！」她自言發生意外後即場爆喊，問到會否擔心破相及嫁唔出？她說：「唔驚，我仲有Market，出事嗰陣都有好多男性朋友幫手。」

照拍追車戲

將會拍攝新片《Z風暴》追車戲的她，不擔心傷口會影響演出：「追車會搞到頭髮亂晒，睇得唔清楚。」她亦有於微博向粉絲報平安。另外，前晚的生日Party亦有不少DaDa的好友出席，並於社交網站上載場內照片，而模蔡瑩瑩亦有到場，但相中則未見「甩牙高妹」的身影，而照片中DaDa仍然安然無恙，笑得相當開懷，相信是在事發前拍下，而舊愛王宗堯昨日也在微博慰問DaDa。