前香港小姐冠軍張嘉兒出道早期因身形較圓潤而慘被封「豬扒港姐」。讀營養學出身的她，雖口癢愛吃口立濕，但近年已積極控制飲食兼運動，更親自下廚炮製健康小食洗甩扒味！

因拍拖而變得愛下廚的張嘉兒，自製「健康薯片」Kale Chips，以健康飲食配合積極運動，有效搣甩脂肪。

Kale Chips製作方法
材料：準備羽衣甘藍、橄欖油及鹽。
Step 1：將羽衣甘藍洗乾淨。

Step 2
將羽衣甘藍切成一片片，兼把中間的莖切除。

Step 3
用廚房紙巾將羽衣甘藍上的水分印乾。

Step 4
放入密實袋中，加入適量橄欖油，再搖勻至每片羽衣甘藍都沾有橄欖油。

Step 5
取出平放在焗盤上，再撒上適量的鹽。預熱焗爐後，調至華氏275度，焗8至10分鐘。

Step 6
完成，可即時食用。

張嘉兒去年滑雪屈親手要做物理治療。

張嘉兒大讚潛水好玩又刺激，更有幸見到鯊魚。

大學在加拿大修讀營養學的張嘉兒（Kayi），一畢業便參選港姐，因而踏入星途。可惜因天生酷愛口立濕，特別是朱古力等零食，令她身形暴脹更被封「豬扒港姐」。近年Kayi為成為Better Me，積極運動再配以健康飲食，雙管齊下。

為男友變賢妻良母

皇天不負有心人，她不但成功收身，亦更見容光煥發，愈瘦愈靚，終擺脫惡名！而近半年Kayi則開始學煮中國菜及一些健康小食，她更甜絲絲地表示全因男友令她變得「賢妻良母」：「以前成日出街食，唔識煮嘢食。但因為拍拖就想好好學習吓，整啲嘢食出嚟綁住男朋友。」

今次Kayi請纓即席落廚炮製「健康薯片」，她說：「呢個『Kale Chips（羽衣甘藍脆片）』係焗嘅，而且Kale係好健康嘅菜，比食薯片健康同瘦好多。』問到原本對下廚一竅不通的Kayi，為何會懂得做這味特色小食，她稱全靠自學：「呢味小食其實喺外國好興，上網睇之後試吓整，點知原來好易。依家仲會向屋企人偷師學煮多幾樣菜式，雖然都試過唔少次失敗，但見自己成功整到，味道又唔錯，都好有成功感！」

潛水滑雪減壓

除飲食變得更健康外，愛運動的Kayi笑言踏入30歲後，運動亦要選擇較為輕鬆的：「以前好鍾意滑雪同游水，但因為上年滑雪屈親手而要做物理治療，就知自己冇以前復原得咁快，所以依家就跑步多。」最愛潛水的Kayi雀躍地分享在世界各地潛水的經驗：「有次仲見到鯊魚，好玩又刺激！」她表示運動可收身外，亦令心情更暢快，是健康有益的減壓活動。

而Kayi坦言當初贏得港姐冠軍後自信心變得更低，幸好有家人及朋友的支持，而她為了減壓亦會向張美妮及好友狂呻：「我喺WhatsApp Group度同朋友呻，可能大家慣咗所以有時會冇回應，但我都覺得講出嚟已經舒服好多。」抱平常心的Kayi已習慣香港近年的批評文化：「如果時光可以倒流，我希望早啲學識化妝同埋笑容，就唔會出現反效果啦！」

女人三十再做學生

大學畢業後參選港姐的Kayi已六年未踏進學堂。年屆30歲的她為興趣修讀公共衞生的碩士學位，並稱讀書帶給她滿足感，是高壓生活中有益的調劑品：「選港姐時我嘅志願係推動健康生活，希望以公眾人物身份做到。」她笑言一開始難以重拾書本，但因藝人身份令她與同學相處更好：「以前一個鐘可完成嘅功課，依家5、6個鐘先完成。但好在同學Nice，仲幫我搵番銀包！」