黃宗澤被爆有名模新歡楊崢，舊愛胡杏兒昨日穿短裙及黑色絲襪到中環整指甲，再會合胡定欣等食飯，期間雖被多番追問舊愛再熱戀等問題，但杏兒依然笑容滿面，「輸仔唔輸陣」！

杏兒笑住蒲頭，卻巧合地跟「情敵」楊崢日前的一身裝扮相似。

Bosco笑住維護女友，希望有更多空間發展戀情。

楊崢駕駛Bosco座駕出入，以正「澤嫂」地位！

高調曝光的「崢澤戀」，男主角黃宗澤（Bosco）日前被拍得與楊崢拍拖，情到濃時啜啜示愛之餘，楊崢更駕駛Bosco古董車出門以示「澤嫂」地位，而舊愛胡杏兒只能在微博晒貓。不過，杏兒昨晚被拍得獨自現身中環，見她穿上短裙長Boot，手執名牌袋到美甲店扮靚，「全副武裝」的她與楊崢日前的打扮非常類同，十分巧合。杏兒之後再到蘭桂坊會合「姊妹團」胡定欣、黃智雯、姚子羚及胡蓓蔚等食飯，期間就記者追問「崢澤戀」時只說：「知道咗喇！祝福咗。」即匆匆離開迴避問題。

過咗「奶奶」關

《好報》昨日再次踢爆Bosco請「三哥」苖僑偉及無綫高層樂易玲等食蠔交代喜訊，三哥爆料指與他傾「人生大事」。Bosco昨日在將軍澳電視城開工時否認「閃婚」之說，對於被拍得與楊崢咀嘴，他說：「冇留意有人偷拍，我唔係聖人，都係做正常人做嘅嘢。（有指楊崢報細年齡，你哋實際相差9年？）歲數唔係問題，最重要係佢喺我心目中係點嘅人。我阿媽好開通，佢哋都見過面。（唔介意佢做高齡產婦？）咁快諗呢啲？講呢啲？我心目中幾歲咪幾歲囉！唔使同大家交代。」他希望大家給予空間發展，並揚言這是最後一次回應戀情。

開咪笑到收工

至於楊崢昨晨再駕駛Bosco愛車返電台開咪，見到記者守候，即展露甜蜜笑容，並答謝傳媒的關心。中午十二時許，她離開電台，被問到是否跟Bosco閃婚？她甜笑說：「唔答喇！多謝晒大家，辛苦晒！我依家返屋企起稿，要出書。（寫愛情書？）飲食書！」之後她返回港島區鯉景灣寓所，落車時更感謝記者護送她回家。