陳智燊（Jason）憑着乖乖仔形象，去年賺到盆滿缽滿，今年他除了預五位數字大派利是外，又揚言睇準時機，上車做業主，就連換車計劃都要暫時忍手！

陳智燊憑乖乖仔形象深得客戶歡心。

雖然陳智燊今年準備了五位數字利是，但都會努力逗利是。

曾與王浩信（右）合作拍劇的陳智燊，下月將有機會再合作。

陳智燊（右）曾與黎耀祥在電視劇《法外風雲》中大演對手戲。

無綫新一代「筍盤」陳智燊雖然去年失落「飛躍進步男藝員」獎，但他憑着乖乖仔形象深得客戶歡心，密密接Job的他今年除了準備五位數字利是外，更看準時機上車做業主，他說：「聽人講今年樓價會跌，所以希望睇定啲上車。（目標幾多呎？）如果買Dream House就唔得啦！但買間細細哋自住或投資我都OK。我本身都好想換車，不過為咗買樓我都忍手啦！」骨子裏洋化的Jason表示，買樓首選西環區，因為看好該區發展：「西環就嚟有港鐵，環境又靚，個街坊感覺好正，又有好多地道舖頭仔。」

做開乖仔的Jason，下月將孖住黎耀祥及王浩信等人拍劇，問到角色會否被定型，他笑說：「我知我做開乖仔可能會被定型，但起碼監製有啱我嘅角色，第一個會諗起我，選中我嘅機會好大！（做奸角？）我都想試吓，不過有咁嘅機會先算啦！」

拒做「肌」佬

而他亦希望趁着開劇空檔嘗試做舞台劇，希望儲多點演出經驗：「之前幾個月冇劇拍，我先發現自己有戲癮，所以真係好想試吓玩舞台劇。（會唔會騷肌？）唔會啦！我其實都冇乜嘢好騷！」