當年以歌手身份入行的田蕊妮，不知不覺間當上了演員，「歌星夢」要在二十年後的今天才成真，回望這段光景，如今夢想成真的她終於可以高呼：「做人原來真係要有夢想，呢二十年使得好值！」

做了二十年演員的田蕊妮，終於可以重返樂壇做歌手。

阿田能夠追尋夢想，全靠老公杜汶澤在背後默默支持。

阿田認為時間不是問題，最重要是心中有夢。

二十年前憑着勝出音樂比賽《末來偶像》入行的田蕊妮，一心想做歌手闖樂壇，豈料天意弄人，在電視圈度過了二十年非歌星路，今年她終於推出「處女碟」，令她對「夢想」有另一番體會：「我已經唔係青春少艾，曾經覺得夢想係好奢侈，甚至忘記咗自己嘅歌星夢，依家機會突然出現，發現原來好多嘢唔係你以為係咁就係咁，所以我都同《超級巨聲》班後生仔講，做人原來真係要有夢想！」

「豪花」7千蚊值得

雖然夢想等了廿年才成真，但阿田卻笑言相當「化算」：「20年感覺好似好長，但其實一年有365日，乘以20年都只不過係7千幾日，如果每日等於1蚊，都只不過係7千幾蚊，當我使咗呢舊錢後發現我經歷咗好多，識得點樣令自己開心，真係使得好值呀！」

由亞視轉到無綫，短短幾年即「升呢」雙料視后，所謂人紅是非多，阿田表示已做足心理準備「迎戰」：「我都有晒心理準備，你冇得控制人生只有好事發生，是非一定有，我只當係新聞一則。」

提到老公杜汶澤當年爆紅後即是非纏身，問到老公可有「過兩招」，阿田聞言即笑說：「嘩！佢條路難行好多，當年我同佢經歷嗰個階段，令我對任何事都有一種幽默感，學識到做人唔好太認真，輕鬆啲，人都開心啲！」