《第三十三屆香港電影金像獎》昨日宣布入圍名單，「最佳男主角」以電影《一代宗師》的梁朝偉火併《激戰》的張家輝最為激烈，但實力同樣非凡的黃秋生、劉青雲及古天樂亦不容忽視！　

張家輝演「賤輝」一角大獲好評，有望問鼎本屆金像影帝。

提到退選演藝人協會會長一事，秋生指已去信曾志偉解釋自己無能為力。

新年食多咗的千嬅險甩腰帶，驚予人「孕」象！

劉青雲（左）與古天樂（右）齊憑《掃毒》爭帝。

上屆影后楊千嬅與黃秋生昨日為《第三十三屆香港電影金像獎》公布入圍名單，王家衛執導的《一代宗師》獲十四項提名，林超賢執導的《激戰》則緊隨其後獲十一項提名，而首次執導的麥浚龍作品《殭屍》獲九項提名，令人刮目相看！在「最佳男主角」方面，《一代宗師》的「葉問」梁朝偉火併《激戰》的「賤輝」張家輝，兩位好戲之人正面交鋒令人期待，《葉問─終極一戰》的黃秋生及《掃毒》的劉青雲和古天樂亦加入戰團，令戰況更趨激烈！

身在柏林影展擔任評委的梁朝偉表示「入圍很開心，是團隊的努力」。張家輝則說：「大家辛勞都很有價值，多謝大會鼓勵，今次四位對手都係我好朋友，所以無論邊個得獎都會替對方開心，邊個攞都冇咩所謂！憑邊部入圍都冇所謂，我依然會繼續努力。」而古天樂開心地說：「雖然張家輝唔係憑《掃》片入圍，但我哋三兄弟（包括劉青雲與張家輝）的兄弟情希望可以延續落去。」劉青雲則指：「開心有份提名，今次入圍全部都係我朋友。（點睇？）梗係好睇啦！」而黃秋生在記者會上笑言若再沒提名便不演戲：「就算有修養，幾十歲都會嬲o架。（兩部葉問對打！）唔理啦，當贏咗啦！（有信心得獎？）梗冇，如果好彩有獎真係可能台上喊。」

千嬅放縱肚皮

導演王家衛對於《一》片獲十四項提名大感開心，麥浚龍對《殭屍》獲九項提名亦指為整個團隊感到萬分自豪：「凡事也平常心，現在是時候關電話平復一下心情。」而內地演員林更新憑電影《狄仁傑之神都龍王》入圍「最佳新演員」，卻被質疑曾演出電影而不合資格。香港電影金像獎大會方面表示：「林更新曾演出的《玩命魔術》是網上電影，未曾在電影院播放。而他在《藍色矢車菊》的戲份相當之少，全片只得兩句對白，評委組看過後認為仍合乎入圍資格。」

頒獎禮將於四月十三日在香港文化中心舉行，當晚設有悼念去年離世的電影工作者環節。而在記者會上，台上的千嬅險甩腰帶，她事後說：「怕你哋話我有咗，依家出去未有人讓位畀我，寫我有喜係開心，但未係時候，之前放新年假放縱咗啫！」