黃宗澤楊崢餐廳激咀

黃宗澤及楊崢日前被目擊十指緊扣蜜遊西貢，其後接受訪問時大方承認戀情仍處於萌芽階段。有圖有真相，昨日本報收到一張珍貴照片，根據兩人衣着，相信該照片攝於大前日年初四兩人同遊西貢當日，熱戀中的Bosco及楊崢除一塊曲奇兩份試食之餘，更前往西貢白沙灣一間餐廳陽台撐枱腳，相中清楚影到兩人在餐廳情不自禁地深情一吻，似乎趁住餐廳人流不算太多，情到濃時便在一角忍不住肉緊咀嘴，沐浴在愛河的楊崢更冧爆，狀甚陶醉！對於「啜蜜圖」，Bosco表示希望得到大家祝福，至於楊崢則說：「總之Bosco講咩就咩啦，多謝大家祝福。」

互相了解認識

而「新任澤嫂」楊崢昨日為《第33屆香港電影金像獎》記者會擔任司儀，又駕駛Bosco的寶貝古董車到場高調宣示主權，以行動證明女友身份，平日待車如待老婆的Bosco，今次連愛車都肯借出，足見楊崢在他心中的地位超然！楊崢到達尖沙咀會場後，甫落車即被記者包圍，但心情大靚的她面對記者的提問只笑不語，其後便匆匆入場。

露出白滑長腿出席活動的楊崢，做司儀期間全程表現風騷，其後接受訪問時被問到拍拖一事，她一臉冧爆說：「係啦係啦！互相了解、認識中，識咗好耐。（Bosco追緊你？）你哋問番佢啦！（拍咗三個月？）互相了解中。」對於二人被目擊在西貢拖手拍拖，楊崢甜笑說：「正常社交啫！（有冇錫？）係啦！大家畀啲空間我。（怕小器要避忌？）多謝大家關心。」她又否認因常到Bosco的蠔吧而擦出愛火，當問撻着經過時，她則表示不能說太多，但又大讚Bosco多優點：「佢孝順又有上進心，好欣賞佢勤力同謙虛。」至於問她是否認識Bosco舊愛胡杏兒，她說：「我知佢係邊個。」又表示不介意姊弟戀，溝通到才是最重要。

記者會結束後，楊崢由助手陪同下駕駛Bosco的古董車離開，雖然被記者追問戀情，但她仍友善地說：「頭先答咗啦！」其後直駛返回其鯉景灣寓所，下車後再被追問是否以後長期揸Bosco的古董車，楊崢只笑住擰頭步入大廈。另外，楊崢昨晨主持電台節目時，被拍檔何基佑追問她跟Bosco的戀情，令她大為尷尬。

好開心好Sweet

至於Bosco昨午返無綫開工時戴上當日咀嘴時的冷帽，提到楊崢揸他的車時，他說：「佢架車拎咗去整。（其他人問又唔借？）咁我有車多，呢架又少揸，咪搵人揸去畀佢。」問到與楊崢發展到甚麼階段時，他說：「OK啦！你哋搞到我好尷尬。（幾時開始想了解對方？）早排啦！2014年頭。（情侶檔搵銀？）遲啲先講啦！」提到二人到西貢拍拖，他則表示是正常社交，並希望大家給予空間讓他們發展：「未見家長。（媽咪知未？）之前就知。（鍾唔鍾意？）OK嘅！（好Sweet？）依家好開心！」他又大讚楊崢EQ高及聰明，不介意姊弟戀：「年齡絕對唔係考慮因素。（閃婚？）唔會啦！了解多啲先。」他又指情人節未知會否開工，未準備。