地獄廚神朱璇煮食當減肥

2008年華姐冠軍朱璇早前學整蘿蔔糕，親自切蘿蔔、撈粉及炒食材，更落足力向師傅偷師，看到製成品後，她說：「第一次整好好玩！返屋企再試吓先！」甚少下廚的她曾炒燶菜而遭表弟嫌棄，勸她出街食，有「自知之明」的她自嘲減肥時才會下廚：「我煮得唔好味，所以自己都唔想食，咁可以瘦番！（以前男友食過？）冇呀！如果整畀男友食，相信會即刻分手！」她認為識下廚的男生很吸引，又透露新年後與父母去旅行，經常黐實父母及好友陳爽（阿爽）的她作狀喊道：「我冇得好似阿爽咁同老公去，好羨慕呀！兩個成日周圍飛。（父母催你搵男友？）有，但呢啲要睇緣分，唔似買餸咁話搵到就搵到！」她希望新一年多點桃花及賺到盆滿缽滿。