樂壇天后容祖兒事業愛情兩得意，趁新春期間，昨日凌晨她偕男友劉浩龍（師兄）到銅鑼灣跟好友蘇永康、梁漢文等食開年飯，據知位位盛惠八百元。離開時，酒過三巡的師兄面紅紅，祖兒則「護龍」上車，認真細心！

劉浩龍「貓貓哋」與祖兒齊齊跟記者打招呼。

祖兒與劉浩龍有影皆雙。

蘇永康與母親及女友Anita出外食開年飯，再由女友開車離開。

陳華國

早前完成合共十五場跨年演唱會的樂壇天后容祖兒，個唱上過足戲「孕」，開玩笑地宣布大肚兼挺着假巨肚出騷，似乎真的想一嘗當母親的滋味。愛情事業兩得意的她，與男友劉浩龍（師兄）感情穩定， 而且愈愛愈高調，踏入雙春兼閏月的馬年，她即跟師兄頻頻出席飯局聚會，儼如「劉氏伉儷」出巡，前晚兩人拜年後，便孖公仔現身銅鑼灣會合好友食開年飯，甜甜蜜蜜度新歲！

昨日凌晨12時許，祖兒跟師兄靜靜雞現身銅鑼灣某商場，從秘道前往一間中菜餐廳，原來是與好友蘇永康、張衞健及梁漢文等共聚兼食開年飯。當晚人人攜眷出席，蘇永康母親亦有到場，十分熱鬧。眾人玩至凌晨2時許，祖兒跟師兄從秘道離開，酒過三巡的師兄面紅紅地與祖兒步出，祖兒甫見記者即報以微笑，心情不俗，但她似乎擔心愛郎的「貓」樣曝光，一邊迴避鏡頭，一邊細心護着師兄，二人急步登上七人車。

甫坐定，祖兒即細心取出水樽與師兄齊齊飲，帶醉的師兄坐在七人車最後排，但仍向記者打招呼才離開。之後，蘇永康與母親及女友Anita亦往取車，他透露剛吃完開年飯，並細心地先安頓母親登車，再自行登上前座，平時做司機的他為免酒後駕駛，改由女友擔任柴可夫。

蘇永康「一家三口」現身

昨日記者致電蘇永康，他表示當晚與張衞健、梁漢文及雷頌德等一班好友成雙成對食開年飯，但笑言入到場是男女分開玩：「全部人都有帶另一半嚟，女人圍埋打麻雀，男人就玩啤牌、玩射龍門。」問到飯局共花了多少錢，他表示每人花費800元，並由眾人夾份宴請蘇母，大家都玩得十分盡興：「食到捧住個肚走！」他又透露當日祖兒與師兄是「後Join」大隊：「嗰日佢哋打畀祖兒，問佢喺邊，祖兒話拜緊年，我哋咪叫佢一齊嚟玩，再嚟派逗利是！」