馬國明、楊怡和羅仲謙等前晚出席送蛇迎馬倒數活動，緋聞男女羅仲謙與楊怡成被玩對象，遊戲對聯竟砌成「大隻仔謙謙，最喜愛楊怡」，他倆只好傻笑扮懵！

楊怡與羅仲謙邊談情邊搵真銀，難怪笑得咁甜！

尷尬的楊怡企圖以身擋着對聯，卻被馬明扮傻整蠱。

馬明對感情事隨緣，唔擔心被催拍拖。

楊怡與羅仲謙這對「緋聞情侶」愛得愈來愈高調，更不介意以情侶檔「拍住上」搵真銀！前晚出席送蛇迎馬倒數活動時成為焦點的他們難得同場，當然成為被玩對象，楊怡在台上透露媽媽每年都會整年糕當回禮送給朋友，司儀即整蠱她：「係咪留畀謙仔？」之後又在砌對聯時砌出「大隻仔謙謙，最喜愛楊怡」。尷尬的楊怡以身擋着對聯影相，馬明就「落井下石」扮傻再讀一次。兩人隨後繼續成「攻擊對象」，被安排並肩而站影大合照，搞鬼的馬明退後一步，促成二人的「合照」，場面搞笑。

馬明感情事隨緣

被整蠱的楊怡受訪時繼續扮傻，被問到有否請謙仔到家中拜年？她說：「禮貌上後輩向我媽咪拜年都應該！（評語？）冇特別喎，咁老土！（畀貼士佢冧未來外母？）咩啊？未來咩啊？唔好送太簡單嘅朱古力囉！」而謙仔被問到與女友同台有否影響歌唱表現時說：「男人嘛，唔易受影響！不過我諗佢都未聽過。（仲有14天可練習過情人節？）咁浪漫？我都未知使唔使開工。（送咩禮物？）搞埋呢個騷先啦，過埋今年再算！」同場的馬明被問到會否擔心拜年時被催拍拖？他笑言冇得擔心，又說對感情事隨緣。