林峯開年飯嗌投降

林峯、徐子珊、林夏薇與黃智雯去年分開發展，甚少相聚，不過身為「老大」的阿峯，近日趁收爐即召集「細妹」食開年飯！他們甫聚首即嘈到「拆天」，子珊與智雯又拿起動物造型年糕賣萌，阿峯見狀亦忍俊不禁。

大唔透的阿峯拿起金魚賣相的年糕，放在子珊與夏薇頭上扮釣魚，兩女乖乖配合擘大口，不過當一道道菜式先後上枱，三女即難掩本性鬥快夾，喪嗌喪笑。本來阿峯欲讓位，怎料三女突然掉轉槍頭夾攻他，智雯與夏薇箍實阿峯，子珊則作狀咬他耳仔，令阿峯投降！向來疼錫堂兄的夏薇，其後親手餵阿峯吃年糕補數。

再夥阿佘拍劇

即將與舊拍檔佘詩曼合作拍新劇的阿峯無懼緋聞被翻炒，亦不擔心女友吳千語呷醋。問到會否帶女友回家拜年？阿峯笑說：「會做應該做嘅嘢，希望畀番啲私人空間我啦！」而子珊相當滿意去年的成績：「無論拍劇定係微電影都有新鮮組合，好有火花。之前放咗個小假期探屋企人兼叉電，已準備重新出發。」至於夏薇與智雯亦期望於角色上尋求突破。