黃秋生昨日宣布放棄競選演藝人協會（演協）會長：「我喺藝術發展局嗰邊好忙，不如留番啲時間做有意義嘅事！（會去下月14日演協會議？）成件事本來唔關我事！（好多圈中人撐你做會長？）為業界盡力仲有好多方法。」

不時跟網民「開火」的秋生鬧爆網上欺凌行為，力撐Ella。

演協會長大熱之一的肥媽昨日受訪，對秋生放棄參選感可惜：「就算佢唔選，我都想佢喺演協幫手。（想氹番秋生？）係呀！你哋幫吓手啦！（秋生撐你當選？）我冇諗過，唔想搞咁多嘢。」

另外，對於官恩娜（Ella）因「包容論」被轟，秋生受訪時聲援對方：「連『包容』同『容忍』都分唔清嘅狹隘民族主義者，無謂為啲廢物影響情緒！內地人唔明白要排隊，你咪同佢講囉，咪以為自己好優越，咁只係傲慢！任何嘢都需要包容！（包容呢班人？）佢哋係惡意中傷，唔使包容！」至於與Ella結交逾十年的張敬軒大讚老友善良又大愛，相信今次只是無心之失，或因她在外國讀書，詞不達意所致，軒仔又稱現時中港矛盾沸騰，政府應想辦法解決。