朱紫嬈鏢心

大約一年前首度接觸飛鏢的Khloe，憶述何以會對此項運動着迷：「起初陪朋友去飲嘢，嗰度有飛鏢機，朋友叫我一齊玩，於是就開始咗我嘅第一次。」甫接觸便愛上掟鏢的她，更火速增添器材：「起初我只係用『公柴』，即係舖頭提供嘅鏢，但玩玩吓開始講究，朋友特登去專門店買鏢，我又買埋一份，依家已經係第三套。」

Khloe透露當初的確只是為玩而玩，後來遇上一班志同道合的圈中好友：「張致恒（Steven）、梁雨恩同我好朋友洪杰同屬一隊飛鏢隊，會定期參賽，我開始同佢哋接觸，後來仲加入成為隊員。」她指坊間每星期都有各類型飛鏢比賽：「有男女單、混合雙打，所以每隊都要有女仔，但因為比較少女仔掟鏢，所以我唔係玩咗好耐就畀人捉去戥腳。」此外，原來隊員還有另一重身份：「我哋全部都係基督徒，隊入面氣氛好好，我見到其他隊為贏而玩，一表現唔好就會埋怨，但我哋成日互相鼓勵，比賽時會成班人坐喺後面幫隊友打氣，我覺得同佢哋相處得好舒服。」

初次出賽似行刑

回想首次參賽，Khloe記憶猶新：「雖然係友誼賽，但行出去時覺得好似上刑場咁，兩隊人望住我，隻手又係咁震，都唔知自己掟緊乜。」她坦言比首次上台唱歌更緊張：「第一次上台唱歌都緊張，但起碼知道呢樣係我強項，但掟鏢係表現自己弱項，會好擔心。」自此，Khloe努力練習，希望提升技術：「班隊員成日都指導我，因為我係最初級最新手嗰個，擔心『佗衰家』，又怕做得唔好影響人，所以經常靠佢哋指導我。」現在每星期都要比賽的她，逢賽前都要特別練兵：「比賽前一晚我會捉住隊長陪我練幾個鐘，第二日比賽信心會大好多。」

訓練耐性計數快

Khloe大讚掟鏢是不會流汗的運動，更令她訓練出耐性：「有時會全日都掟得好差，起初會發脾氣，但原來愈發脾氣就掟得愈差，慢慢就學識要有耐性，其實道理同做人一樣。」又笑言對數字不敏感：「掟鏢訓練到計數，我以前一見數字就頭痛，永遠都記唔到電話號碼，但依家精靈咗好多！」除了市面酒吧紛紛添置飛鏢機外，亦有不少純粹練習掟鏢的場地：「酒吧比較雜，後來我轉咗去叫『道場』嘅地方，呢度主要掟鏢，唔會有酒飲。」現在有鋪「飛鏢癮」的她表示平日工作後就會到道場練習，或者在家上網觀看外地高手的比賽片段，希望改進技術。

小圈小格易上手

近年興起的飛鏢運動，玩法相當簡單，最普及的為「01 Game」，每名玩家可選擇301、501和701分等開始遊戲，根據鏢上劃分的20格數字擲出飛鏢，然後扣減分數，而每格數字內又包含兩個表示「Double」和「Triple」的小格和中心小圈，擲中的玩家會得到所屬數字的雙倍和三倍分數，而每次擲到中心圈的玩家就會得到50分，最快將分數扣至0分就勝出。