謝霆鋒、任達華與衛詩雅等昨晚為英皇電影《救火英雄》舉行謝票活動，慶祝該片在港澳上映至今收2,589萬元票房。Chok爆現身的霆鋒心情大靚，透露老闆楊受成已準備100萬花紅，作為兌現衝破2,000萬元票房的承諾。雖然曾揚言不取一分一毫花紅，但他笑言不介意自己加碼！身為拍檔的華哥亦對票房大表滿意，還打趣建議老闆把100萬分紅兌換成10蚊現鈔，任由演員攞得幾多得幾多：「一千蚊紙我唔要，上次想兌張2008年一千蚊紙都搞成半個鐘，今年利是都唔會封金牛，封10蚊啦！因為膠冇得模仿！」他還笑言該片會否開續集要問霆鋒，語帶雙關表示不知對方有否新女友當拍檔，記者即旁敲側擊問華哥是否信霆鋒與文詠珊（Janice Man）拍拖，他卻故弄玄虛說：「嘩！咁呀！真係要拍《救火英雄前傳》先得！（襯唔襯？）同邊個都襯，霆鋒又靚仔又Chok！」

新片票房報捷，霆鋒現身謝票活動時都特別佻脫。

抱着BB的霆鋒，夥華哥等演員與觀眾大合照！

對於華哥一番言論，霆鋒不斷搖頭否認：「真係冇！（諗住搵？）冇打算！（冇定唔可以公開？）真係冇。」談到有指一擲2,000萬於新加坡買樓給前妻張栢芝，條件是要求她帶一對仔回港團年，霆鋒聞言再搖頭，並以「費事答」來回應，但透露稍後會到當地探仔：「依家咩都唔使郁，嗰邊都幾好。」還透露一對兒子會定期返港。