金像影后珍妮花羅倫絲（Jennifer Lawrence）日前於金球獎奪得最佳女配角後，公然與翻撻影星尼古拉斯霍特（Nicholas Hoult）咀嘴宣示戀情！前日有外國八卦雜誌指尼古拉斯已成功向珍妮花求婚，明年正式拉埋天窗！

據《OK! Magazine》報道，珍妮花於上月帶尼古拉斯回家鄉肯塔基州，與家人一起過聖誕，尼古拉斯趁機向珍妮花求婚，有知情者透露：「成家人都聚喺客廳過平安夜，突然尼古拉斯叫全部人聽佢講嘢，之後企起身拖住珍妮花隻手，然後跪低拎隻戒指出嚟叫珍妮花嫁畀佢！」據悉求婚戒指價值近200萬港元，珍妮花當場開心到喊及大叫「我願意」！

其實早於去年11月，《OK!》已報道珍妮花與尼古拉斯訂婚的消息，又稱二人計劃於布拉格舉行婚禮，剛巧珍妮花當時被拍得左手中指戴上疑似訂婚鑽戒，但後來再沒有於公開場合戴鑽戒，令訂婚一事不了了之。今次報道指二人今年拍戲太忙，故計劃明年才舉行婚禮，婚後至少生4個小朋友，認真誇張！不過，另有傳媒聲稱向珍妮花的相關人士查證，對方回應：「絕對不真實！」

安祖蓮娜傳急救「樹根手」

此外，曾傳出與未婚夫畢彼特（Brad Pitt）於今年夏天結婚的安祖蓮娜祖莉（Angelina Jolie），被指為了以最完美的姿態做新娘，計劃接受整形手術解決煩擾多年的「樹根手」問題，知情人士說：「安祖蓮娜原本冇打算去理啲手根，直至揀咗件冇袖婚紗先至想整走佢，其實佢增肥就可以解決呢個問題，但佢唔會選擇咁做。」