何傲兒（Lily）及梁烈唯（唯唯）日前齊齊擔任視障學生領跑員，為下月舉行的渣打馬拉松備戰。其中Lily大爆練跑時出現不少「蝦碌」，至於唯唯則自稱勤做運動而操出最靚「人魚線」。

唯唯（左二）與何傲兒（右二）與拍檔齊齊練跑。

何傲兒大爆曾「摸黑」練跑，嚇到不敢開步。

唯唯自嘲「長跑初哥」，試過跑十公里辛苦到嘔。

何傲兒及梁烈唯近日參與馬拉松101「伴你同行」訓練計劃，成為視障學生的領跑員。他們以「導跑繩」與拍檔一齊練跑，為渣打馬拉松十公里賽事積極備戰。平時運動量不多的Lily受訪時直言參加長跑賽是個挑戰，更大爆練跑時發生「小意外」她說：「有次我唔記得提佢（視障學生）前面有個轉彎位，結果我哋撞埋一齊，好彩冇仆親同擦傷。」

她又透露試過「摸黑」練跑：「每個領跑員都要試，蒙眼跑步真係令我好恐懼，嚇到唔敢開步跑！」至於經常運動的唯唯則自嘲「長跑初哥」，他說：「我平時踢波講求爆發力，自己本身唔係太鍾意長跑。之前試過跑十公里，辛苦到嘔呀！所以我係個『初哥』！我拍檔（視障學生）反而好有經驗，佢跑得仲快過我，要佢就番我速度就真！」

自讚人魚線最靚

談到做運動操Fit身形，他即點名提及羅仲謙及袁偉豪等《飛虎》劇集演員，更自認在他們之中擁有最靚的人魚線：「個個拍完劇後都話唔操（身形），其實就操到爆！羅仲謙條人魚線就最巨大，袁偉豪就幾工整，但我先係最靚嘅，最突出又工整！」