
AOA家姐大Ann(左)和妹妹細Ann,大讚所穿的潮服又Young又靚!
藝人黎國輝(阿感)去年與好友豪擲六位數搞時裝,日前送孖妹組合AOA新打歌服,他又有意為兩女打造「正、負」品牌。阿感更自爆獲台灣天王羅志祥(小豬)大讚有型,因潮流而結緣的二人原來一直有洽談合作。

阿感有意為AOA設計一個「正、負」品牌。

子楊(左)細心向AOA推介打歌服。
藝人黎國輝去年11月中與好友子楊合資38萬元自創時裝品牌,他笑言已出盡人情牌,找來圈中好友做宣傳,早前更邀得AOA上舖試潮服,更送贈二人新衫當打歌服,她們立即賣口乖笑說:「着到個人Young咗又靚咗!」至於有否藝人趁機搵着數?阿感說:「唔使,我哋會自動獻身,香港係個互相幫助嘅城市,好多人會做演唱會舞台衫,但平日嘅打歌服、出騷衫我哋可以幫到佢哋,唔使吓吓咁華麗。」他直言希望與AOA合作,並大讚兩人雙腿修長,穿上短裙、Legging加棒球褸已十分有型。
談到AOA經常以孖妹造型示人,原來二人私下性格大不同,細Ann(吳燕菁)愛着褲較男仔頭,大Ann(吳燕珊)則愛穿裙子較Lady,細Ann直言長大後介意孖妹打扮,阿感則有意為她們設計一個「正、負」品牌,他說:「如果兩個一正一負唇齒相依,但又各走極端,相信會好特別。」
小豬勁Buy
阿感又自爆與潮人羅志祥惺惺相惜:「同佢相識係因為潮流,首次同佢做訪問,咁啱我拗柴揸住支拐杖,加上當時留鬚、長鬈髮,佢覺得我好有型。」問到會否邀小豬撐其品牌?阿感說:「要去到好大件事先會動用呢張牌,佢自己有品牌,我哋一路有傾Crossover,佢都話要幫忙可以搵佢,但我希望自己去到咁上下地位、追近天王先同佢Crossover,我唔想好似佢單方面幫我咁,但我都會打畀佢問意見。」他又希望品牌拓展到內地及台灣的龐大市場。
問到會否效法阿感做生意?細Ann說:「我想搞時裝或化妝,因為女仔都鍾意扮靚。」大Ann則笑言想跟妹妹搞孖妹品牌,並大讚阿感有心學習,兼有心思及創意。
影視組