算是半個荷蘭人的張致恒（Steven），自9歲起便從未回過荷蘭。相隔20年，他決定請媽媽一同回鄉探望廿多年來只聞其聲、未見其人的外婆，向她親口說一句「我愛你」。

Steven坦言人愈大、家庭觀念便愈重，令他更珍惜與家人相處的時間。

Steven十分掛念遠在荷蘭的外婆。

Steven打算請媽咪返荷蘭探望外婆。

Steven（左）與家人相處融洽，只要看他與媽咪攬到實便知道。

很多人都知道張致恒的媽媽是荷蘭人，卻想不到Steven這半個「荷蘭仔」，居然20年來都未曾踏足荷蘭！去年事業大豐收的他決定請媽媽一同回鄉兼順道旅行，他說：「5月會同阿媽返去探吓婆婆，上年成家返咗去，但我要拍劇行唔開，其實9歲之後我都冇返過去。我知阿婆好想見我，嗰時我仲好細粒，依家我成個阿叔咁！」他又指人大了才驚覺家人重要：「以前會覺得返去都唔知做乜，自己唔識荷蘭文，機票又貴。但人大咗，就愈想同屋企人黐多啲，因為永遠唔知下一秒係點，屋企人錫得一下得一下。」

完全不諳荷蘭語的Steven只懂一句「我愛你」，而這句話一直維繫着他和外婆感情，他說：「我阿媽隔幾日就會打電話畀婆婆，每次都叫我講兩句，我都唔知講咩，講廣東話佢又聽唔明。阿媽由細到大又淨係教我哋『我愛你』嘅荷蘭文點講，所以永遠一拎起電話就淨係識講呢句，婆婆就會呵呵呵咁笑！」

上真人騷圓夢

9歲那年，Steven曾舉家回荷蘭，原來是因為外婆的一個夢，他說：「嗰年婆婆參加電視台嘅一個節目叫《夢想成真》，因為佢好多年都冇見過我哋成家人，所以佢嘅願望就係希望我哋返去見吓佢，點知真係抽中咗婆婆喎，所以電視台就包晒機票請我哋成家人返去。嗰次係我第一次上電視節目，但係去到電視台又畀人趕我同細佬出去，因為啲大人喺度講嘢，我哋就喺隔籬打側手翻，好百厭，係咁阻住人拍嘢，結果畀人捉我哋企埋一邊唔畀郁！」