傅嘉莉昨日出席商場活動時自爆早前到德國旅行時遇上九霄驚魂，乘坐飛機時遇到氣流，因安全帶太鬆，頭部差點撞到機艙頂，嚇到花容失色，幸獲身旁的男士安慰。

Kelly提起早前坐飛機的驚險事，仍心有餘悸。

Tais（左二）及Kelly（中）出席商場活動，並與學生合照。

有子萬事足的Tais，新年會帶囝囝睇煙花。

藝人傅嘉莉（Kelly）及模特兒Tais Fortes昨日出席apm《第九屆創意潮人年宵市集迎新歲》活動，提到有新聞指不少人乘坐小巴時未有佩戴安全帶，Kelly自爆早前聖誕節到德國旅行，坐飛機時遇到氣流被拋起，因而發現安全帶十分重要：「嗰次我有扣安全帶，但可能校得有啲鬆，咁啱遇到氣流，我成個人好跌蕩，拋到個頭差啲頂到去頂喇！都幾驚！（係咪身邊有男仔安慰？）少少啦！」另外，她透露讀書時曾整心形花紋手繩於年宵攤位擺賣，手繩的價錢原定10多元，但竟被炒高多倍，當時有位心儀她的男同學向她表示花了100元買她所製的手繩。至於今年收入暴增，新年是否會多派利是？Kelly笑言公司早已幫她扣起5位數字，用作派利是給客戶。

Tais搵阿媽幫手湊仔

同場的Tais則表示，新年會與15個月大的兒子看煙花，又指小朋友開始大，她可以學煮中國菜給小朋友品嘗。問到會否為照顧小朋友而放棄模特兒工作？她說：「唔會放棄，依家媽咪嚟咗幫手照顧囝囝，我以小朋友行先，嚟緊有大計劃，到時再宣布。」她又透露前夫林雨生有探望小朋友及一同食飯。