2013年度最後一張樂壇成績表於前晚頒發，樂壇天后容祖兒及林峯成為首屆「民選歌后、歌王」，當提到另一半有否投票時，祖兒即甜笑回應，而林峯亦Sweet爆地說：「正常都支持『自己人』！」

祖兒在《勁歌》擸得6.5個獎，自然要飲香檳慶祝！

成為首屆「民選歌王」的林峯，獲粉絲大搞慶功，更一齊開香檳。

英皇歌手共奪得14個獎，成為全場大贏家。

容祖兒及林峯前晚分別榮膺《2013年度勁歌金曲頒獎典禮》的「最受歡迎女／男歌星」，成為大贏家！作為首屆「民選歌后」的祖兒謙虛地說：「其實都幾緊張，投票呢啲嘢冇得預測，應該要Keep住，未試過有四首半嘅歌攞獎，好有代表性！」早前患咽喉炎失聲的她表示已好了六、七成，不過前幾日把聲仲「萌萌哋」，又自爆獻唱前緊張到成身汗。問到男友劉浩龍（師兄）有否陪她睇醫生，她即甜笑說：「自己睇得啦！唔使成日好似『黐頭芒』咁，要保持空間！」問到有否叫師兄投自己一票，她繼續甜笑說：「冇喎。（佢識做？）OK啦！正如你哋講『唔係唔投吖嘛？』」對於無綫指來年會預非合約歌手一齊玩，祖兒即自嘲：「都好，我都驚我出嚟（拎獎）太多次大家想嘔呀！」

鍾舒漫大開「中門」

在英皇慶功宴上，提到「民選歌王」林峯在台上致詞時未有如去年般公開多謝BB（吳千語），他即笑說：「太多人要多謝喇！（有冇叫BB投票？）冇喎！（佢識做？）正常都支持番自己人嘅。」至於有傳他不再續約無綫，他說：「成日都有呢啲傳聞，我都開緊工啦！同佘詩曼、苗僑偉合作。」同場還有「中門大開」賣性感的鍾舒漫，問到有否給男友吳浩康過目，她笑說：「電視應該睇到啩？」

許廷鏗唔敢攞大獎

此外，失落歌王寶座的大熱許廷鏗說：「我先出道四年，呢個獎太重喇！」而謝安琪則自爆與老公張繼聰要「重新開始」：「我叫佢由頭追過我嚟面對七年之癢。」《勁歌》去年的平均收視為19點，今年大躍進至21點，祖兒奪得「金曲金獎」一刻就錄得全晚最高收視24點，有一宗投訴指賽果不公。而劇集《舌劍上的公堂》大結局則錄得27點，最高31點；《貓屎媽媽》則錄得平均27點，最高28點。