近日有報道指黃日華妻子梁潔華患重病，女兒黃芷晴昨日出席活動時澄清母親並非患癌：「冇咁嚴重，亦唔使化療。」她指母親上月中旬入院，但不願透露何時出院：「媽咪想低調啲。（媽咪一直唔退燒？暴瘦？）都冇發燒，亦冇瘦到，食到嘢嘅，依家情況已經好好。」她坦承有喊過：「始終家人有唔舒服都會關心，盡量放咗工抽多啲時間陪佢。（影到爸爸愁眉不展？）咁啱啫，佢個樣係咁，我哋依家心情OK。」又有指因醫療費昂貴，故黃日華要狂接工作撲水，芷晴笑說：「其實啲工作一早簽晒約，我哋會Keep住做嘢同照顧佢。」

黃日華甚為愛錫老婆梁潔華，工作之餘亦全心照顧。

芷晴透露母親病情有好轉。

另外，華哥好友張兆輝接受電話訪問時對華嫂患病表示不知情：「上個禮拜三同黃日華練波都唔覺佢有異樣，似平時咁有傾有講，都好開懷，所以未必咁嚴重。」而阮兆祥昨日在活動上得悉梁潔華患病亦甚為擔心，並祝福對方早日康復。