在娛樂圈，「成敗論英雄」總是少不免，要做到「敗不餒」談何容易！過去一年，王君馨經歷兩次失敗，但憑着樂天性格，竟由大輸家扭轉成大贏家。或許你會　大隻眼問：「點解嘅？」就由君馨以行動回答。

雖然輸掉比賽，但獲得工作機會和友誼，君馨其實是人生贏家。

鍾意跳舞的君馨性格活潑，企棟棟唱歌？Not Her Style！

輸咗《星夢傳奇》唔緊要！反正君馨（右）賽後不時能與進身三甲的鄭俊弘和陳明恩一同出騷。

君馨（左）在《My》劇素顏上陣，比化行妝的徐子珊更有話題性。

縱然失落「飛躍進步女藝員」獎，君馨仍大方戥岑麗香高興。

君馨不介意為工作披嫁衣，但真係結婚就要30歲後。

輸比賽贏關注

還記得王君馨說過當初夢想是要成為一名跳唱歌手，雖然在節目《舞動奇跡》被發掘出跳舞才能，但卻無人知曉她的唱歌天分！及至《星夢傳奇》一出，即令她有在台上載歌載舞的機會。

甘願被友打低

回想入圍《星夢》，君馨難掩興奮心情：「初初以為入唔到圍，好傷心o架！覺得做歌手嘅夢想冇咗！當知道第四集有得比賽，真係好驚喜！同埋最開心係可以同『星夢Family』咁Friend，我成日都話『一日星夢，一世星夢！』」

「友誼第一」，已成為君馨的座右銘！即使在被淘汰一刻，她亦未有感到失望，反而因好友能繼續比賽而感到幸福不已：「記得我Out嗰集，一係葉暐留低，一係我留低！但我知葉暐好似Fred（鄭俊弘）咁，等咗十幾年先有機會。如果佢可以唱多一集，可能生命已經不一樣！我唱咗5集已覺得好感恩，所以好想佢贏！」

輸獎贏口碑

在這殘酷的競賽中，君馨竟如此偉大，令人不得不對她說一句：「傻的嗎？」不過傻人有傻福，去年她在台慶頒獎禮中首度提名「飛躍進步女藝員」！縱然君馨最終輸給好姊妹岑麗香，不過她在劇集《My盛Lady》中飾演男人婆Madam，演技令觀眾讚嘆不已：「王君馨識做戲？真係o架？」好評如潮，劇中的潮語對白又Hit爆，君馨笑言即使拍到喉嚨痛都抵：「其實要壓低把聲都辛苦o架！套劇出街時我返咗內地拍戲，收到好多讚我做得好嘅訊息！其實我好享受做呢個角色，又可以粗魯，又唔使着裙同高踭鞋！不過最Amazing係啲粉絲話我素顏仲靚過化妝！」

難忘借錢度日

輸掉「女飛躍」，又如何？雖然君馨看似傻傻哋，但其實她一點也不傻，更深明機會比獎項更重要：「其實輸贏真係唔重要，對我嚟講，我最希望係日後嘗試到多啲唔同嘅角色、工作機會，然後儲多啲錢。因為我窮過，試過8個月一個Job都冇。如果儲到錢，就算將來唔多嘢做，都唔使向屋企人借錢。」

愛得深冇婚別

友情得意，工作漸上軌道，那麼愛情又如何呢？問到何時才跟男友D先生結婚？君馨斬釘截鐵地說：「結婚暫時唔諗，都係30歲之後，依家我同男朋友知道彼此係The One就得！我哋感情好好，好支持大家嘅事業，所以唔急結婚！」

所以說，娛樂圈其實是長途戰，即使失獎，最重要還是獲得觀眾、戰友和男友的支持！君馨由輸家變贏家，真想對君馨說一句：「你好叻呀！」

後記：藝人不偽

訪問當天，君馨抵達服裝店後，因太餓的關係，叫了海南雞飯外賣醫肚，邊受訪邊扒了幾口飯，經理人見狀即大感驚訝，擔心她拍照時會凸出小肚腩。不過君馨卻笑說：「我太肚餓喇！」很多時，藝人只會呈現最光鮮亮麗一面，但君馨卻願意向觀眾展示她最真一面，證明她是貨真價實的藝人，而並非「偽」人。