藝人何傲芝（GiGi）、許亦妮及葉翠翠等昨日出席節目《搵個好男人》記者會，日前有報道指其緋聞男友蕭正楠拍劇時被黃翠如姣溝，GiGi力證與對方關係不變：「冇變過，從來都係好朋友。（影到你向親友哭訴？）唔係，當時抹嘴啫！家人都知雜誌講嘅嘢唔可信，而且佢拍緊劇，咪當宣傳囉！（之前半夜喺微博留言暗指有人唔識返屋企？）誤會嚟，係有人打咗幾次電話嚟都唔出聲。」提到蕭正楠指翠如似變性人，她說：「咁咪好索？我諗翠如喺佢心目中應該都係女神。」

GiGi與「男友」蕭正楠的關係未受緋聞影響。

蕭正楠

同場的翠翠坦言心急拍拖：「心急咗好多年，每年所有願望都係想搵個錫我同有愛心嘅男友，外表同其他條件唔重要。」許亦妮則預告會在節目中坐「冷板櫈」：「因為畀人嘅感覺唔易接近。（性感引仔？）想拍拖反而要密實啲，咁先會欣賞我性格！」