筍盤馬國明最近大受女星歡迎，繼朱晨麗及朱千雪後，連師姐級的佘詩曼亦被他迷倒！兩人昨日風騷現身，阿佘直認有Feel，馬明亦指對方合乎理想對象的要求，但因事業及身家不及對方，故不敢發動攻勢！

阿佘不避嫌表示對馬明有Feel，而馬明亦直指她是理想對象！

曾與馬國明傳緋聞的「情敵」朱千雪（左）及朱晨麗，即使同場亦毫無芥蒂。

馬國明（馬明）接陳豪棒成為新一代筍盤，隨即被傳獲港姐朱晨麗及朱千雪垂青，有指單身多時的師姐佘詩曼（阿佘）亦被他迷倒，早前到新加坡拍戲時更姣溝對方！眾主角昨日出席活動，阿佘及馬明偕胡杏兒、楊怡及岑麗香等出席無綫「GOTV」跨平台視頻點播服務活動，同場的兩人不但未感尷尬，更互送秋波！

提到被指姣溝馬明，阿佘說：「講得咁衰，係佢溝我，『姣』字咁冇文化，用『追』啦！（真係追？）唔係，微電影入面有少少Feel。（佢話同你Level唔同，唔敢要求親熱戲？）佢太謙虛，依家佢Level好高！（筍盤？）我都係筍盤！（人哋係男神喎！）佢好專業同有風度。（會深入了解？）咁嚴重，暫時未有時間。」她又表示將與前緋聞男友林峯開拍新劇，更透露頸傷已康復8成，雖然新劇有安排替身，但亦會盡量親身上陣。

緋聞女友千雪Ready拍拖

至於馬明亦坦承追阿佘：「梗係，佢咁好！（有咩攻勢？）未有，高攀唔起。（佢話你Level高！）阿佘係我心目中理想對象80%，剩番20%係我事業未夠佢好，錢未夠佢多！（你兩個都唔細！）結婚冇分年齡，情投意合就得！」而「情敵」朱晨麗及朱千雪則出席另一活動，並表示碰面不會感尷尬。期間，朱晨麗祝福馬明新一年「馬」上有錢，問到為何不祝福對方有女友？她笑說：「冇得話一祝就有！（等人開口追？）隨緣啦！」千雪則表示已準備好拍拖。