秋生寸爆芷菁冇資格
演藝人協會（演協）前日選新會長時爆內訌，有意角逐的黃秋生被秘書長陳芷菁指不跟規矩而拒諸門外，激到秋生碌地示威！昨日內訌白熱化，二人於網上隔空開火，其後秋生於電話中愈鬧愈激，句句有骨寸爆芷菁「咁耐冇嘢撈」，質疑她的會員資格，擺明不放她在眼內，芷菁只拋出一句「公道自在人心」，雙方戰火升級！
嬲爆的秋生句句有骨反擊芷菁，更揚言可動議罷免她的職務。
何必為難我?
陳芷菁在微博表示：「請放過我小女子。」
秋生前日入會被趕走，激到碌地示威！
邵音音昨日再在微博狂轟有人背後搞事。
黃秋生前日帶隊到演協申請入會兼角逐新會長時，慘被秘書長陳芷菁指「唔係會員」兼「唔跟規矩」請食「閉門羹」，嬲爆的秋生於門外碌地以示不滿，還怒斥被侮辱！會議最後流會，演協已定本月21日再開會選會長及委員，而昨日的內訌進入白熱化，據知其他演協會員認為是二人的意氣之爭，搞到局面太僵，而有會內的資深會員被秋生的碌地行為嚇怕，反而支持用溫和手段的芷菁。雖然秋生嬲到貼地，但據知他向身邊人透露未必退選，認為要為公義而戰！
至於二人昨日於網上繼續隔空開火，芷菁率先在微博出招，強調去年12月20日已叫秋生及他的班底搞入會，又指有電郵和文字記錄為證。10分鐘後，芷菁再發微博寸爆秋生前日碌地的大戲︰「黃秋生的戲，我一直都很喜歡看。他昨天在演協外扮暈同嘔，我看過片段後，亦覺得太可愛了！」並表示自曾志偉辭去會長一職後撐得好辛苦，叫秋生放過她︰「請放過我小女子，我只代會籍組要求交表格，何必為難我們呢？ 」擺明向秋生宣戰！
畀面志偉
至昨日傍晚秋生終於忍無可忍，在微博和Facebook分別寫上「請陳秘（陳芷菁秘書）放棄我」和「被拒門外怎入會呢？」反擊芷菁的言論，及後秋生於電話中直言不知演協21日再開會︰「係咩？冇通知我，唔好搞我啦！我已經被玩咗鑊，搞到人哋以為我手上嘅會章偷番嚟！」對於何時再填Form申請入會，他開名寸爆芷菁「冇嘢撈」︰「要審批藝人資格，我Check佢就差唔多，佢咁耐冇嘢撈，我懷疑佢冇資格！依家離開會10日都唔夠，都唔知審唔審批到，我覺得唔好罔顧個會章。」
其後秋生愈說愈激動，揚言可動議罷免芷菁職務︰「依家法律形同冇嘢，違反會章！先唔講入會，淨係入嚟借枱填Form都唔得，過嚟乞米呀依家？仲係呢個人決定，唔係個會，你邊個呀？江青呀？我唔覺得你側邊有毛澤東喎！」他又引用志偉的說話，指非會員的藝人有事都會幫手，轟芷菁因他不是會員就無視他︰「佢叫我放過佢，我求佢哋放棄我啦！佢哋內部搞清楚先啦！嘥時間！好多朋友都話呢個係三煞位，果然係咁麻煩！又講咩黑箱作業，我依家喺黑箱外，唔喺入面，佢知唔知咩係黑箱呀？講嘢冇邏輯！我哋個個睇志偉頭，畀面志偉，陳芷菁我幾乎都唔記得呀！」至於芷菁未有覆電話，只以短訊回覆︰「要講嘅講晒，公道自在人心，有問題可找會籍組梁珊。」
有人搞事
此外，演協名譽理事邵音音昨日在微博狂轟有人背後搞事，寫道︰「沒有公平。只有誰有錢誰有勢。以我理解，某人對付秋生，不讓他參選會長。因為他最有可能選上。這只是我的想法。」昨日音音姐於電話中未肯透露誰人獨大︰「我覺得成件事好賤，唔係針對人。」她直言不會退會。而志偉昨日則在台灣主持除夕節目，玩得十分開懷。
