自陳豪「封盤」後，藝人陳展鵬及馬國明接棒成為無綫筍盤王，展鵬表示「緣分到就結婚」，而馬明則揚言「未遇到心儀對象」，出席活動時更十分享受畀女圍的感覺！

馬明獲5歲廣告小童星送香吻，令他甜入心。

展鵬輕吻小粉絲額頭，盡顯父愛。

陳展鵬與逾百名粉絲共度37歲生日，十分熱鬧。

自陳茵媺下嫁陳豪兼誕下愛子後，陳豪正式「封盤」！展鵬及馬明即接棒成為「無綫筍盤王」，難怪出席活動時齊齊「畀女圍」！展鵬昨日與逾百名粉絲共度37歲生日，大會安排了小粉絲上台送金咪，寓意展鵬唱多些歌，而興奮的展鵬更親吻小粉絲的額頭！問到何時成家立室，他說：「緣分到就結婚！遇啱就嚟啦！（屋企人催？）唔會催，佢哋想我身體健康啫！依家五、六十歲先生（BB）都得，結婚都係想我傳宗接代，唔係嘅就拍吓拖先啦！」

而在馬鞍山出席賀年活動的馬明則獲5歲廣告小童星送上香吻，令他甜入心，問到新年會否留時間給緋聞女友？他搞笑地說：「邊個先？好多個喎！今年唔知點解特別旺（緋聞），但係冇一個係真！」

冇畀佘詩曼溝

日前又有報道指他與佘詩曼到馬來西亞拍微電影時被「姣佘溝」，馬明即笑說：「真係畀阿佘估中個標題！我哋拍嗰時已經知有狗仔隊跟，我同阿佘就估雜誌封面標題，點知畀佢估中咗！」對於報道，他只是一笑置之，提到他已被全城關注，問到何時封盤？他笑說：「點解呢？不過依家冇心儀對象，想搵心儀劇本多啲！」