謝霆鋒拍戲向來以搏命見稱，所有危險動作均親身上陣，以致保險公司不敢受保，想不到連個唱的構思也被批評太危險而遭否決，以至遲遲未開騷。

精於廚藝的霆鋒揚言仍相信童話式完美結局的愛情。

久未開個唱的霆鋒早前傳出11月開騷，日前他接受訪問時，對此未有正式回應，但暗示機會不大，他解釋是公司滿足不了他的危險要求：「開演唱會我有要求，好似上年大家講嘅世界末日，我覺得個主題好啱做演唱會，我同公司講想做啲道具唔可以矮過80呎，例如要有塌咗一半嘅自由神像或金字塔呢啲代表性嘅Building，但公司話太危險。」

大膽本色

霆鋒坦言覺得紅館騷不夠癲：「我希望人哋睇到個幕跌落嚟，要講粗口先有壓迫感，我想做室外，多啲人，希望大家會話『死嘢咁鬼離譜』，如果唔係就唔使做，搞個集體回憶算數。」霆鋒工作向來大膽搏命，例如他在2004年拍《新警察故事》時被繩索吊在灣仔會展外牆，令他差點窒息及一度失去幾秒知覺，2012年拍攝《逆戰》時由八樓一躍而下，以至最近的《救火英雄》由於爆破距離太近，令他一度失去聽覺，看來他想連演唱會也發揮大膽本色，難怪遭公司拒絕。

相信愛情

電影方面，霆鋒最近與內地女星高圓圓合作一部愛情片，他坦承回復單身後拍這類戲比較好。被視為城中筍盤的他自稱不是好男人：「好男人嘅基本係維持一個家，呢一點我冇做好，而且我依家30幾歲，我認為好男人係需要由時間去證明，十年後再話我係都未遲。」雖然經歷婚姻失敗，但揚言愛情對他很重要，仍然相信童話式完美結局的愛情。

雖然霆鋒無意在紅館開騷，但不少歌手爭崩頭，今年落實在紅館開騷的包括張智霖、陳慧嫻、古巨基、周柏豪和張敬軒等。

另外，霆鋒經理人霍汶希表示霆鋒去年已計劃舉行演唱會：「佢嘅諗法係喺舞台製造一個世界末日，但我哋做唔到，因為比較危險，好多嘢紅館唔會批，其實演唱會未落實幾時做，暫未有定案。」