名模馬詩慧（Janet）御夫有道，即使老公王敏德（Michael）婚後屢傳緋聞亦冇有怕。自言EQ高兼信心爆棚的她表示，夫婦相處貴乎「信」。子女固然是維繫感情的要素，但同時也是引起爭執的其中一個原因。

名模馬詩慧一直抱着一個「信」字來維持婚姻。

Janet認為夫妻的相處之道，在乎互相尊重及包容。

熱愛家庭的Janet（中）經常一家五口出席活動。

Janet（左）與大女王曼喜經常孖住出席公開活動，早前二人性感現身香港電影金像獎頒獎禮，謀殺了記者不少菲林。

Janet與Michael結婚21年依然十分恩愛。

王曼喜（左）曾被拍得與一名男友人到中環夜蒲。

馬詩慧在感情路上可謂身經百戰，未成年時與比她年長27年的前土木工程署總技師黃重生結婚，後來因王敏德的介入致婚姻破裂，又因懷有身孕而奉子再婚。婚後的她主力打理家務，閒時才出席公開場合。已結婚21年的二人，仍不時一家五口出席大小公開活動，大晒家庭幸福。

人前晒幸福，人後卻不時被拍得Michael與索女夜蒲，甚至傳出他搭上按摩女郎，可謂桃花不斷。到底Janet是如何寬容對待各種流言蜚語？她笑說：「我EQ高，而且我好有自信，所以我會相信佢！」她又表示夫妻之道在乎互相尊重及包容，還要給對方空間：「不過如果有關於佢嘅緋聞傳出，我都唔會完全當冇事發生！因為我都要同小朋友交代，同埋要回應記者嘅問題，好多時我仲未問佢，佢已經知咩事，會自動同我講番發生咩事。」

捧蛋的啟發

除了一個「信」字，家中三名子女亦是他倆維繫感情的必要元素，Janet說：「Michael咁大個人，佢知道要對小朋友同屋企負責，要顧及家人嘅感受！」她坦言與Michael從未有激烈吵架，在她印象中，最嚴重的一次意見分歧，就是討論子女的學業問題，她說：「因為我一向都好着重小朋友嘅學業，而佢就負責娛樂部分。喺啲小朋友細個嗰陣，我會晨早六點叫醒佢哋溫書，而Michael因為咁而好唔開心，覺得我過度勞役仔女，之後我哋嗌大交，我同佢講：『我就試吓完全唔理，睇吓有咩後果！』之後我一個星期都冇逼小朋友讀書，結果佢哋嗰次默書係零雞蛋！我問Michael佢接唔接受到呢個成績？之後佢就死死氣咁話『OK！ You are right！』之後佢冇再干涉我點教啲仔女！」

適當的妥協

Janet與Michael都是有主見的人，令他們的相處更困難，幸而他倆都能互相忍讓，找到一個舒服的相處方法。最佳例子就是送二女王麗嘉到美國讀書的決定，她坦言不捨得太早把愛女送到外國讀書，始終年紀小，加上外面多誘惑，怕她誤交損友學壞。相反，Michael則認為讓女兒到美國接受正規的高球訓練，能讓她向着興趣發展，這才是真正為女兒着想。經過一番內心的掙扎及與家人商量後，Janet最終都作出妥協，含淚讓女兒到外國留學，她說：「其實我唔捨得咁早畀佢過去o架！係Michael送佢過去o架咋！不過我教咗個女咁多年，都應該對佢有信心！我教出嚟嘅仔女唔會咁易被動搖！」

相處貴乎坦誠

星二代不時成為傳媒的追訪對象，而Janet的大女王曼喜更屢次被拍得與朋友夜蒲吸煙，就連正常的社交活動亦被大肆報導。她承認子女出生在這樣的家庭，活在傳媒監視下是無可避免：「佢唔開心，因為畀我知道咗佢再食煙。我有同佢講其實佢出去同朋友Hang Out唔係一件壞事，佢都知我同Michael點諗。我哋係一家人，咩都可以拎出嚟傾！」

後記：不拘小節

訪問當天，Janet換了數套衣服，其中一套配襯了Over Knee Boots。換鞋時，她怎樣也脫不掉那對Boots，不拘小節的她最後向公關求救，把長Boots拉出，場面搞笑。事後，她笑說：「平日喺屋企除唔到嗰陣，我都係叫啲女幫我手！」