由任達華、謝霆鋒、余文樂及吳浩康等主演、導演郭子健執導的英皇電影《救火英雄》，上映以來大受歡迎，票房直逼2,000萬！昨日郭導偕影帝任達華及吳浩康到尖沙咀為電影謝票。

華哥在電影中「殉職」，令老婆琦琦詐晒型！

任達華行上觀眾席謝票，粉絲即蜂擁而上握手兼合照，你睇華哥幾受歡迎！

郭子健被指成為賣座電影導演，心情大靚！

阿Deep興奮地與「救火」公仔合照。

影帝任達華（華哥）昨日出席電影謝票活動，透露票房已達1,648萬，更大讚《救》片是他去年最滿意的電影：「希望票房向2,000萬進軍！到時老闆會派獎金，而獎品就係阿Deep（吳浩康）同我提名最佳男配角！（唔想提名最佳男主角？）留畀霆鋒同余文樂啦！總之套戲係我喺2013年最滿意同最好睇嘅電影！」有指他在《救》片中的「殉職」戲份十分催淚，老婆琦琦看完後向他「詐型」，華哥聞言笑說：「佢有喊。（你拍危險鏡頭，老婆有冇詐型？）佢鬧我話以後拍之前要話佢知，我幾難受呀！不過下次都係拍咗先會同佢講。」

吳浩康演技獲讚賞

至於同場的吳浩康獲華哥大讚演技，他坦言恍如打了強心針：「多謝華哥！佢係我好欣賞嘅演員同藝人！」又表示受華哥的敬業精神感動，更身體力行大減30磅肥肉：「有次喺片場，有人請華哥食薯片，但原來佢為咗Keep身形而冇食零食幾十年，令喺度搏殺嘅我都自慚形穢，所以減咗30磅！」

被指一躍成為賣座電影導演的郭子健笑說：「係咩？（有冇加人工？）冇，我哋簽咗約，後面仲有兩部戲要拍！」另外有傳他與周星馳（星爺）不和，因二人合作執導的《西遊．降魔篇》獲金像獎提名，但導演名單僅列星爺一人，後來才獲有關方面更正並加回他的名字。他表示是行政疏忽：「加番名咩？諗住冇加就多番啲同情分，啲票數可以去《救火英雄》度。（會唔會介意？）唔介意，會尊重周先生公司嘅決定，應該係公司嘅疏忽。（同星爺不和？）唔係，其實一直以嚟都係以學生心態同星爺合作，佢係我偶像，合作期間都冇衝突，我仲同星爺研究緊拍《西》片續集，好樂意同佢再合作！」