黎明愛將李治廷與范冰冰的緋聞甚囂塵上，雖然兩位當事人未有公開承認戀情，但昨日李治廷出席活動時不諱言在適當時候就會帶冰冰見家長！

李治廷與Mandy Lieu以電單車賽車手造型示範名錶。

李治廷（Aarif）昨日以電單車賽車手造型與混血模特兒Mandy Lieu出席瑞士腕錶品牌帝舵表新品發布會。問到可會送隻錶給緋聞女友范冰冰？Aarif說：「呢隻個Feel唔知佢鍾唔鍾意。（你送佢梗鍾意！）係咪？好呀！（揸電單車載女朋友？）冇呢個諗法！以前試過喺外國揸綿羊仔載女朋友，掟彎唔係好順，唔係攬唔攬實嘅問題，係會重咗，不過都可以試吓。」

Mandy借啲意攬仔

至於農曆新年可會去冰冰家拜年，Aarif反問：「去佢度拜年？我留喺屋企陪媽咪過年，如果唔係我驚我呢世都冇湯飲。（帶埋冰冰返去？）陪媽咪好啲。（媽咪有冇叫你帶冰冰畀佢見？）媽咪梗係唔會叫！（佢見過冰冰未？）佢喺螢光幕見過好多次，佢話人哋（冰冰）做戲好叻，我做得唔好，成日寸我。（幾時畀媽咪見真人？）啱見時就會見，喺啱嘅時候就會見到啱嘅人，時機成熟會同大家講。」對於老闆黎明的爸爸去年過身，他表示沒有聽對方提過，很久沒見老闆，有微信聯絡，不覺得老闆有異樣。

另外，Mandy表示喜歡懂賽車的男生，問到坐男生駕駛的電單車是否很浪漫？她說：「如果個男仔係自己鍾意嘅就可以借啲意攬住佢。我都試過。（感覺點？）快樂！（成唔成事？）唔成事，係中學時代嘅事。」農曆新年，她希望返馬來西亞見出生數月的姪仔！