戲院偷拍 許亦妮急耍冧

演藝界一直被翻版、盜錄問題困擾，多年來一直向公眾提倡保護知識產權訊息，但身為一分子的許亦妮卻立下壞榜樣，前日她到戲院觀看有份演出的電影《喜愛夜蒲3》時，竟然在戲院內公然用手機拍攝電影畫面，並把兩張相片放上微博，其中一張是她與陳柏宇演對手戲一幕，懵然不知犯法的她還在微博得戚地說：「昨晚又去看喜愛夜蒲3，竟然和雨僑同場，散場才知道……好！今晚再去看，爭取同場機會！」昨日她似乎終於知道自己犯法，急急刪除該微博。

侵權被斥愚蠢

許亦妮昨日接受電話訪問認錯道歉說：「係我細路女唔識世界，以後都唔會咁做，事前真係唔知咁樣係唔啱！我見到自己演出太興奮先咁做，唔係要盜錄，有網民提醒我，我已經即刻刪除咗微博。」問到可擔心被起訴？她說：「希望大家原諒我！我真係唔係有惡意嘅。」而《夜蒲3》的導演錢國偉為她講好話：「當時佢想影張相畀我，話睇咗套戲幾次，好支持套戲啫！唔存在利益關係，佢細路女無心之失，希望大家手下留情！」

而為海關拍攝反戲院盜錄宣傳片的任達華說：「可能佢太年輕，只係諗起將照片放上社交網站宣傳，對於藝人呢個係宣傳方法，無可厚非，大人不記小人過，如果佢知錯，大家原諒佢啦！唔係無綫又少個藝員！都係好小事，唔係將成套戲拍晒上載就得。」至於黃國桐律師對於許亦妮在戲院內拍攝，並公然放上微博一事，他直斥是愚蠢行為：「雖然唔算構成盜攝刑事罪行，因為通常盜攝係指成套戲、或者一節片段，但係影幾張相已經係侵犯版權行為，要負上民事責任，版權持有人可以作出民事起訴。」