默認與李桂蘭兒子戴尚安（Sean）蜜運中的謝婷婷，昨日出席活動時不時把玩尾指的金戒指，事後受訪又將戒指戴在無名指上，問是否Sean所贈？她否認：「唔係佢送，買嚟戴喺中指，但唔啱戴所以戴尾指。（去Sean度拜年？）唔知呀。（佢有冇嗌你去？）係咪太早喇？唔使咁正式。（帶佢同你Daddy媽咪拜年？）唔知佢哋喺唔喺香港。（覺得去佢度拜年，發展得太快？）唔係，朋友都會去拜年，唔會自己主動話去。（你默認咗戀情，佢有冇確認關係？）冇。（畀壓力佢確認你？）唔會，順其自然。（2月14日先確認？）唔會咁老土，呢啲要互相傾。」

蜜運中的婷婷出席活動時一臉風騷。

Shine玩轉碟時十分投入。

此外，提到前嫂嫂張栢芝帶兩個囝囝去新加坡讀書？她說：「之前佢哋返嚟冇見過面，但Lucas佢哋有Send聖誕快樂畀我。（農曆新年同姪仔過？）唔知，但好希望有得過去搵佢。（佢哋讀番書係咪好開心？）係呀！」

同場的組合Shine成員徐天佑透露日前已拍畢的電影會延遲上映，因要報名參加外國影展，因戲中不乏粗口對白，有機會分開兩個版本上映。黃又南則忙於跟蔡卓妍及黃秋生拍攝新片，他與秋生不乏對手戲，獲益良多。