薛凱琪（Fiona）與鄭中基在賀歲片中飾演夫婦，獲吳君如傳授古法「造人」甫士，二人更到時鐘酒店「爆房」！Fiona笑稱大開眼界，但有潔癖的她表示不會跟未來男友往時鐘酒店。

近年常演喜劇的薛凱琪，很高興再與君如及志偉做對手戲。

與鄭中基合作無間的薛凱琪，於今年賀歲片一同再炮製笑彈，無懼勁敵周潤發。（資料圖片）

熟手抱B的薛凱琪雖未有男友，但想生BB。（資料圖片）

今年Fiona於賀歲片《六福喜事》中與鄭中基扮演一對老夫老妻，兩人遭吳君如迫使重拾愛火去「造人」，當中不乏搞笑的生仔情節，Fiona更大爆和鄭中基有「床戲」：「我哋有啲搞笑嘅床戲，君如專用古法秘方，例如生仔嘅甫士同食嘅嘢嚟逼我哋去做。（咩甫士？）梗係誇張、唔真實、為喜劇而做嘅甫士啦！但我哋係着晒衫，純粹搞笑！」

其中一幕，他們更要到九龍塘時鐘酒店「爆房」，首次到時鐘酒店的Fiona笑言大開眼界：「我哋間房個主題係歐式，有鯨魚式嘅噴水按摩池，我諗一生人都唔會去呢啲房，因為本身有少少潔癖，拍戲前攞滴露噴霧劑周圍噴，但間房得百幾呎焗住晒啲味，導演就笑我當佢哋曱甴，大家都有研究啲價錢幾平！」問到若男友要求，會否去時鐘酒店？Fiona表示相信未來男友是個斯文人，不會帶她到品流複雜之地。

喜劇接班人

由於在片中常與BB做對手戲，Fiona笑指已抱到很熟手，對氹B亦耳熟能詳，拍攝期間鄭中基又常晒愛女照給她看，令她都恨生仔：「由細到大都鍾意小朋友，我都想有BB，但要有老公先。」提到獲君如讚是喜劇接班人，Fiona指未感壓力，因君如和鄭中基都好好笑，後者常在片場跟她鬥嘴、搞爛Gag，志偉也常鼓勵她多拍片，Fiona卻笑稱對方經常爆肚：「佢好專業咁排晒戲，但全部都係假o架，一埋位佢爆啲對白，你心裏會鬧佢『死佬』，佢好鍾意令你接唔住，考你執生。」

對於今年賀歲檔遇上勁敵周潤發，Fiona認為兩片題材不同，可讓觀眾有多個選擇：「我覺得好似樂壇咁，唔應該淨係聽死一個人。」