前港姐冠軍陳庭欣（Toby）最近與親友合資開設樓上日式餐廳，榮升老闆的她凡事親力親為忙到一頭煙，Toby笑言遺傳了母親的慳家本色，購物時甚少亂揮霍，相當精打細算，甚有做生意潛質！至於新一年展望，Toby直言埋首工作，但仍期望在餐廳內發展一段美味情緣。

Toby笑言沒有時間認識新朋友，希望在餐廳內發展一段「美味情緣」。

Toby表示全靠廚師出身的拍檔Jay省靚餐廳招牌。

Toby與拍檔一齊合力炮製鐵板燒。

最近染指飲食界的2010年港姐冠軍陳庭欣，與圈外友人及家人在銅鑼灣開設樓上日式餐廳，主打鐵板燒及矜貴和食，Toby個人更豪揼六位數，難怪她對這盤生意充滿熱誠，無論店舖裝修、餐牌設計、入貨及會計等她都給予意見，早前甚至被拍到充當「苦力」搬花樽上舖頭，訪問當日她更向大廚拍檔Jay偷師，練習鐵板燒的手勢，相當投入！

格價買平貨

問到是否有生意頭腦，她笑言算術不算太好，但遺傳了母親的慳家本色：「我阿媽好清楚邊度買嘢平啲，會分幾間舖頭買唔同嘅嘢！（遺傳到畀你？）有少少啦！如果就近都會比較吓，去間平啲嘅舖頭買。」自稱慳妹的她表示，購物時甚忍得手很少亂揮霍，更會搵朋友幫手攞優惠，笑言這「長處」頗能幫到做生意。

問到會否覺得自己是「賢妻良母」？Toby笑說：「我諗我係合格，平時啲日常用品唔會用貴，如果用到平價買到貴嘢會覺得威咗o架！（之前男友有冇讚？）咁又冇，又唔係同居，只知我用嚟用去都係同一個手袋，試過同外國朋友敍舊，發現我件衫七、八年後仲着緊，都好驚訝。」

回望2013年，Toby榮升老闆娘轉變甚大，新一年她在工作方面更有野心，最想是餐廳回本以及演藝工作更上一層樓：「希望餐廳可以賺到錢，話晒係我同家人第一個投資，藝人事業當然會繼續兼顧，做主持同拍劇都想，司儀方面已經有三年經驗，唔再係新人，所以要鞭策自己做得更好，目標係一個月十個騷，如果阿Bob（林盛斌）同楊洛婷接唔晒可以分啲畀我o架！哈哈！」

Toby近月因為埋首工作，深感疏忽了家人，希望之後可分配到時間多陪父母：「成個月冇同佢哋飲茶喇！

抗拒姊弟戀

觀乎今年計劃都是圍繞工作及家庭，Toby表示對感情事不強求，暫時列在她排行榜最後一欄：「工作可以控制，但愛情冇得掌握，要嚟就嚟，有目標先算。」

雖說唔恨拍拖兼冇人追，但Toby笑言也期望在餐廳內發生一段美味情緣：「呢排成日返舖頭，冇時間去其他地方識人，寄望朋友會介紹人嚟食嘢，發生段情緣就好喇！所以對方一定要鍾意食日本嘢！（仲有咩擇偶條件？）冇不良嗜好，我唔鍾意食煙飲酒同蒲，仲要高過我，年紀大過我五年以內，唔接受細過我嘅男仔。（叫好友莊思明介紹？）佢成日帶啲有女友嘅男仔上嚟嘅，係都介紹畀家姐（莊思敏）先啦！」