余文樂原定昨日與謝霆鋒等「兵分三路」返內地宣傳新片,想不到突然發高燒未能離港,其負責的南京站交由導演郭子健「獨挑大樑」。病榻中的阿樂錄製聲帶向粉絲致歉。霆鋒得悉拍檔抱恙時說:「大家一齊出生入死,希望佢早日痊愈啦!」

余文樂因發高燒未能離港,被迫取消往南京宣傳《救火英雄》,並在微博交代病況。

霆鋒(左二)率領陳偉霆、衛詩雅及吳浩康往廣州謝票,場面熱鬧。

由謝霆鋒及余文樂主演的英皇新片《救火英雄》氣勢如虹,單是香港方面已衝破千萬票房,老闆楊受成早前公開表示會「達標分紅」。原定昨兵分三路前往內地繼續宣傳,當中包括霆鋒率領陳偉霆、衛詩雅及吳浩康往廣州謝票、任達華偕洛詩飛往武漢與粉絲互動,以及樂仔與郭子健亮相南京跑戲院,想不到樂仔前晚開始發高燒,在醫生建議下留港休息,認真慘情!

樂仔助手梁小姐昨回覆記者說:「樂仔喺北京宣傳返港已經有啲唔舒服,點知尋晚開始發燒,本來諗住食啲藥頂住,但之後仲有其他工作,唔想影響到,咪叫佢去睇醫生囉,點知醫生話佢燒到百幾度,根本唔可以搭飛機,仲畀咗幾日藥佢『傍身』,叫佢一定要多啲休息。」樂仔因病被困家中,連續兩日在微博留言向粉絲交代病情。

郭子健獨挑大樑冇壓力

身在南京的郭子健接受長途電話訪問時說:「大家都好鍾意套戲,粉絲又好體諒樂仔嘅情況,所以我冇壓力。(老闆楊生傾拍續集?)已經講過,但要睇大家嘅檔期囉!」至於身在廣州的霆鋒,當得悉樂仔抱恙,即替對方打氣:「大家係好兄弟,拍呢部戲好似一齊出生入死,佢之前都好落力做宣傳,希望佢早日康復啦!」此外,霆鋒憶述拍《救》片時最難忘是站在綠布前做戲 ,加上新戲服又重又解不開,令他大感不習慣!