田蕊妮力撐冇反骨
由亞視轉戰無綫的田蕊妮（阿田）愈戰愈勇，更榮升「雙料視后」，威水到極！不過阿田得獎致詞時的「我由冇咩人睇嘅電視台開始做」言論卻令亞視高層葉家寶嬲爆，昨日他以「飲水不思源」、「不負責任」狠批阿田！阿田得悉後指其言論其實是對亞視昔日栽培心存感激。
阿田過檔無綫後愈來愈紅，早前更膺「雙料視后」。
阿田與譚耀文合作《縱橫四海》而對演戲產生興趣。
葉家寶指阿田應飲水思源。
出身亞視的田蕊妮自從轉戰無綫後愈來愈紅，早前更憑劇集《巨輪》中的「倀雞英」角色成為台慶「雙料視后」，日前更豪花五位數請《巨》劇台前幕後食飯，派頭十足！雖然阿田得獎乃開心事，不過其上月在《萬千星輝頒獎典禮》中聲淚俱下訴說的得獎感言「我由冇咩人睇嘅電視台開始做，到依家有咁多人睇，得到觀眾認同。」卻被指暗踩亞視冇人睇！
「唔負責任嘅講法」
其言論令亞視高級副總裁葉家寶耿耿於懷，昨日他出席活動時寸爆阿田！提到亞視新動向時，葉家寶指春晚會邀請過去曾舉辦過的歌唱比賽得獎者參與，又說：「亞視嚟緊會搞第4次春晚，會請張崇基、張崇德唱歌，可惜依家請唔到田蕊妮！其實佢係亞視出身，做人要飲水思源！」擺明插1993年參加亞視歌唱比賽《未來偶像爭霸戰》奪冠而進身娛樂圈的阿田。
其後，葉家寶再插阿田的言論「不負責任」：「係唔負責任嘅講法，亞視由嗰個年代到依家都好多人睇！」他更指亞視就算面對新競爭對手都未驚過：「我哋會做好自己，而競爭對手都唔會局限於本港，嚟緊亞視會喺年中開劇。」
暗寸自我感覺良好
昨日，本報記者致電阿田，對於葉家寶的指摘，阿田說：「我拎獎番言論係冇踩任何電視台，我出身亞視，我冇飲水唔思源！」她自言對亞視心存感激：「我要多謝亞視當年畀機會我拍《縱橫四海》，當時我未做過演員，但因為呢套劇培養咗我對演戲嘅興趣，亦令我有今時今日嘅成就！」而談到亞視找她演春晚時，阿田說：「亞視都冇搵我唱，同埋合約都唔允許。」對於葉家寶自言亞視多人睇，阿田則說：「一間公司自我感覺良好係一件好事。」
