「宇宙最強」甄子丹於昨日《好報》報道的2013年男星「鐵人吸金榜」中，以年賺2.5億力壓收入達2.36億的古天樂，成為港區吸金王！子丹卻謙稱冇計過，向古仔笠高帽，踢爆對方搵得仲多，又自言生活慳儉：「着嘅衫都係贊助。」

甄子丹宣傳新片，擺出孫悟空的招牌動作甚有威勢！

古天樂一年拍8部電影，埋單全年賺逾2億。

《好報》新一期內容豐富，睇慢啲都蝕底！

昨日《好報》報道大中華區男星2013年「鐵人吸金榜」，「宇宙最強」甄子丹登上港區吸金「冧巴溫」，去年以每部3,000萬人仔片酬接拍4部電影，加上多個商演及廣告代言，全年總收入達2.5億港元！緊隨其後的是狂拍8部電影及11個廣告代言、收入達2.36億港元的古天樂，第三位則是吸金1.75億港元的謝霆鋒，年賺8,400萬港元的郭富城及8,300萬港元的梁朝偉緊隨其後，但統統不敵年吸金逾5億的內地型男黃曉明，冠絕大中華男星！

子丹昨日到apm出席星皓電影《西遊記之大鬧天宮》宣傳，對於去年賺逾2億壓倒古仔成港區最搵錢男星，他即時「交波」給古仔：「冇咁多，古仔多過我啦！唔好關注錢，不嬲我都唔計錢，生活又樸素，着嘅衫都係贊助。」

古仔怕被追稅

問是否交很多稅？子丹說︰「稅就會交，唔知交幾多，會計師會搞，總之會交要交嘅稅啦！」至於被笠高帽的古仔昨日透過經理人謙稱指實際收入不便透露，但又笑說︰「唔好成日同佢計數，會畀稅局追稅。其實古仔唔係一年拍晒8部戲，有啲前年拍但上年上，有啲係友情客串，唔係套套收咁多。」

另外，子丹於活動中透露拍攝《西》片時相當辛苦，飾演孫悟空的他每次化妝已花5小時，共用1,000小時，加上拍攝時攰到爆，他直言心力交瘁，至於是否不再演此角，他說︰「唔想拍啫！有恐懼感同壓迫感，好大壓力。」但能與周潤發及陳慧琳等合作，他認為相當難得。