許亦妮、郭穎兒（Celia K.）及夏尉喻（寸嘴Barbie）等前晚出席新片《喜愛夜蒲3》謝票活動，許亦妮獲朋友包場支持，眾人以睡衣作主題，紛紛穿上睡衣睇戲。聽來雖然香艷，但許亦妮及一眾演員卻打扮密實，唯獨寸嘴Barbie入場後拉低外套拉鏈，靠3吋事業線挽回不少分數。問到為何入場後突然露事業線？她笑說：「要睇情況，每次都唔知遇到咩觀眾，佢哋熱烈我就拉低啲，反應好就拉到落肚臍，愈嚟愈少布！」

唔跟大隊着睡衣的許亦妮，風騷謝票。

文凱玲（左起）、寸嘴Barbie、Celia及許亦妮，孖住導演錢國偉出動為新片造勢。

對於朋友出錢又出力，未有穿睡衣的許亦妮說：「迎新年着睡衣唔好，但見現場啲人都好Hyper！（之前畀人杯葛，依家見面會尷尬？）都冇嘢，今日佢哋嚟即係粉碎咗，如果票房去到2、3千萬我會着睡衣，5千萬就着泳衣囉！」Celia則喜歡謝票活動，因能夠即時看到觀眾反應。