打得之人安志杰（Andy）在新片中飾演助理消防區長，雖然只得一場救火戲，但已滿足了其兒時夢想。他又直言「拍乜都得」，最近接拍愛情喜劇，亦希望在動作片方面更上一層樓，難怪Andy忙爆無暇再談戀愛，並笑言懶理媽咪催拍拖。

安志杰希望兼顧動作片之餘，亦可接拍不同類型的電影。

雖然周身傷患，但安志杰不會放棄武打路線。

飾演助理消防區長的安志杰（右）多數時候都穿着整齊，並與謝霆鋒對手戲甚多。

武打影星安志杰在英皇電影《救火英雄》中飾演助理消防區長，與主角謝霆鋒及余文樂不乏對手戲，片中身居要職的Andy雖只得一場衝入火海的戲份，但他笑言已滿足了其兒時夢想：「細個喺外國生活想做消防員，有份情意結，當年冇考係因為貪玩，未咁有責任心。」提到與霆鋒已四度合作，他直言默契十足，一埋位即可交戲：「同佢演戲好安心，拍戲可以即刻入戲，一Cut機就傾偈同玩，不過近排大家都冇打機，係少咗話題。」

Andy去年接連有《激戰》、《特殊身份》及《救》片上映，身手了得加上爆肌身材令人難忘，早前更被「宇宙最強」甄子丹盛讚有資格做接班人，對此Andy謙虛地連講兩聲「Thank You」：「有少少驚，有其他人好過我嘅！」但亦無疑為他打了強心針，即使滿身傷患已不顧：「膝頭、嘴角、手都有疤，頸同腰仲會風濕，但我會繼續拍！」對演戲甚有追求的他希望可擴闊戲路，月前在內地試演愛情喜劇，亦不介意為拍戲摧毀苦練多年的Fit爆身段：「增肥一百磅或者勁減磅都得，其實只要健康就得，最擔心係香港電影畀唔夠時間，會傷身體。」

媽咪催拍拖

自與霆鋒胞妹謝婷婷甩拖後，Andy一直忙爆保持單身，問到會否感寂寞想找個伴？他說：「我唔心急，想專心工作先，悶會搵朋友、做運動，或者陪媽咪家姐。（媽咪催拍拖？）有，佢想我穩定，但我話好忙呀！跟住走咗去。（同婷婷仲有聯絡？）一段時間冇，但仲係朋友。」