楊受成、謝霆鋒、馮小剛、任達華及胡軍等昨晚於北京出席《英皇集團2014「築業為家」年度盛典》，戴黑超的霆鋒挾新片《救火英雄》的超讚口碑，甫出場即「畀女圍」，盡顯筍盤魅力！

Chok爆的霆鋒戴黑超現身，對內地Fans的熱情照單全收。

霆鋒於晚宴上不忘谷戲，獲女粉絲力撐。

人唔到的成龍拍片作賀禮，發揮幽默本色！

陳偉霆（左起）、郭子健、任達華及胡軍型爆出場，現場即嘩聲四起！

楊受成、謝霆鋒、馮小剛、任達華、惠英紅、胡軍、陳偉霆及衛詩雅等昨晚現身北京柏悅酒店，出席《英皇集團2014「築業為家」年度盛典》，成龍因忙於宣傳新片而未能出席，但亦拍片祝賀，他於片中稱楊受成為「Honey」，並笑說：「Honey係我多年好友，帶我去夜總會、舞廳、卡拉OK、傾拍戲，今晚我攞5萬蚊出嚟抽獎，唔夠嘅再加5萬，問楊生攞！哈哈，反正佢下次見到我都唔記得問我攞o架啦！」風趣得令賓客捧腹大笑！

食勻世界

另一焦點則要數「城中筍盤」謝霆鋒，他穿黃色冷衫、牛仔褲及戴黑超作潮人打扮，甫出場即被女粉絲圍，紛紛取出手機爭影合照，霆鋒說：「我好多年冇出席呢類型晚宴，你有幾何喺呢啲場合見到我？但我今日好開心，因為喺香港搞嘅英皇70周年晚宴我有去，喺北京搞嘅我都要嚟！」對於女粉絲的熱情舉動，他說：「最緊要佢哋開心！」談到有指張學友早前出現在霆鋒位於香港的公司，有揣測是為紀念梅艷芳的活動傾合作，霆鋒說：「知佢哋搞緊但唔可以代佢哋講，所以唔可以好清楚咁話畀大家知，因為公司幫我接咗湖南活動，我唔能夠現身，但心裏面懷念阿梅就夠！」對於外傳為阿梅豎立銅像一事，霆鋒表示不知情。而在晚宴中段，英皇宣布霆鋒將與內地單位合作飲食節目《12道鋒味》，屆時霆鋒將碌盡友情卡，走勻世界各地與友人分享美食，他更獲楊受成及經理人霍汶希送上一張霆鋒廚師造型海報作鼓勵，楊受成誇口指定必追看節目。

至於任達華指與英皇合作愉快：「同英皇合作2年幾，合約快到期，好大機會續簽。（叫楊生加人工？）冇開口講，但老闆會自動加嘅！頭先係我第一次坐楊生嘅私人飛機，傾咗好多拍戲嘢，楊生叫我出年執導但我冇時間。好感恩英皇明白我需要，祝佢哋生意愈做愈好！」他又贊成《救火英雄》原班人馬開拍警察題材的電影。惠英紅則專程由馬來西亞趕赴北京出席盛會，問到是否心急搵個伴，她說：「急o架！（擇偶有乜要求？）冇，好人就得！（接受異地戀？）梗得，唔排除閃婚添！」