歌手胡琳（Bianca）平日除了鍾意玩音樂練歌外，嬌滴滴的她亦酷愛小手作。近年皮革手作成為一股新潮流，坊間亦有不少工作室開班教學。因此，Bianca趁聖誕及新年假期，抽空多學一門新手藝，落手落腳學做心意皮革小飾物。

Bianca今次學識整皮革，聖誕新年送禮唔使愁啦！

「吃」的確是有效的減壓方法，不過小心別吃太多變胖喔！

STEP 1

STEP 3

STEP 5

STEP

手帶完成

得閒無事在家便會DIY的Bianca，原來一早對皮革手作深感興趣，但礙於工作忙碌及所需工具繁多，她遲遲未有落手實行。今次Bianca趁着聖誕及新年假期空檔，終於在2013年結束前踏出第一步學皮革手藝，為朋友及家人製造一份心意小禮物！向來喜愛皮具的Bianca，對皮革獨特的氣味更是喜歡：「我好鍾意皮具，尤其係真皮嗰陣味！每次買新皮袋同皮鞋，都會拎住聞佢陣味！」

織頸巾情人嫌棄

整皮初哥Bianca第一次學習製作皮具，雖然只是製作簡單款式的手帶，但工序已經十分繁複。製造過程中不時要出力揼及壓，這些「力的表現」對於瘦小的Bianca而言，似乎是一大困難！為了在厚實的皮料上鑿出一個小洞，她拿着錘子費力狂揼，認真我見猶憐！但面對這項「新挑戰」，Bianca沒有半點退縮，反而愈玩愈上手，更希望自己的手作能在特別日子裏作禮物送出：「雖然今次嘅手作只係初階班，但比我想像中冇咁困難。喺節日或者其他特別日子諗唔到送咩禮物嘅時候，呢啲心意小禮物係一個好好嘅選擇！」她更下戰書，希望日後可以挑戰製作更高難度的皮具，例如卡片套、散子包或銀包等。

臨近大時大節，無論朋友或是情人，都會自備小禮物互相送贈。Bianca卻表示未曾收過Hand made的禮物，但自己就送過不少：「歷任男友都收過我親手織嘅頸巾，而我個人好心急，會連續幾日不眠不休咁織，仲要織到好長！」但她卻酸溜溜地表示，不會再織頸巾做禮物：「細個嗰時嘅諗法係，我不眠不休咁織畀你，喺冬日畀到溫暖你，係一件幾咁美好嘅事！但係從未見過佢哋戴出街，所以依家唔會再織！」愛心頸巾唔係人人Buy，現在Bianca送禮終於有新搞作：「學識做皮革之後，發現原來都唔係咁困難。我諗以後都可以自製啲皮革小飾物送畀朋友，唔使下下都織頸巾！」

動靜舉止慢條斯理的Bianca追求簡約生活，她笑言學做皮具正正符合其性格：「雖然整皮不時都要好大力，但都有好多細心嘅位，例如縫製和度位等。而我亦好鍾意簡單嘅設計，自製皮具嘅款式通常比較簡單，啱晒我！」近日天氣驟冷，Bianca表示會安排時間畀自己：「私人時間好重要，雖然聖誕氣氛好熱鬧好開心，但我都好Enjoy靜靜哋留喺屋企做手作嘅過程！」

香港人，輕鬆啲啦！

都市人工作壓力大，生活節奏緊張，Bianca認為每個香港人都要學懂減壓，但減壓方法卻是因人而異。而她的私家減壓方法是約一班好朋友High Tea：「平時我鍾意約朋友去一啲好舒服，Relaxing嘅咖啡室Hea吓，傾吓偈。有咩悶氣、開心唔開心都會分享，個人冇咁壓抑。」

運動同樣可減壓，早前天氣較清涼，Bianca便約朋友行山：「適量嘅運動，例如行山，唔單止可以接觸多啲大自然，仲可以舒展身心，對我嚟講係好好嘅減壓方法！」

皮革手帶製作方法

STEP 1

揀選心儀的皮革，當中「植鞣革」是全天然鞣製，適合製造長時間與皮膚接觸的手帶。

STEP 2

使用手啤機和刀模剪裁出手帶的款式。

STEP 3

利用錘子及圓沖揼出小洞。

STEP 4

裝上五金配件或鈕釦。

STEP 5

利用英文字母壓模，在手帶上揼壓出想要的名稱。

STEP 6

塗上處理劑修飾皮革底面及邊位，再用修邊器令邊緣變得圓滑。

手帶完成