余文樂主演的英皇新片《救火英雄》，向來Cool爆的阿樂今次放下型男形象，首度扮演帶子洪郎，他與「囝囝」合作愉快之餘，又戲稱對方為「大佬」。至於相隔多年再與謝霆鋒結片緣，阿樂認為大家成熟不少，話題由工作到人生都說個不停。

阿樂一向是沉默寡言的Cool男，這次演慈父定必為觀眾帶來新鮮感！

阿樂（左）和霆鋒在火場中並肩作戰，型到爆！

阿樂在火場中拯救兒子，盡顯父愛偉大！

郭子健（左）為了把消防員人性化，把阿樂變成「自私爸爸」。

一向喜歡小朋友的余文樂接拍英皇新片《救火英雄》，與10歲童星結片緣扮演兩父子，阿樂大讚「囝囝」：「佢好可愛！記台詞又好得，有時仲要提埋我，我覺得佢先係大佬囉！」今次拍攝對一眾演員來說，絕對是一場消耗體力的耐力賽，他說：「真正嘅消防員都返1日放2日啦！但我哋喺片場連踩十幾小時，好似胡軍咁都熱到汗流浹背，如果喺夏天拍真係唔知點算！每日仲要孭住幾十磅重嘅制服連裝備，由當初消防員幫手着，到後嚟我哋乜都自己嚟，連佢哋都讚我哋勁！」

導演郭子健希望將消防員「平民化」，例如謝霆鋒的角色盡顯人性陰暗面，而阿樂則「自私地」將兒子看得比任何東西都重要，由於演得過癮，阿樂相當滿意郭導的安排。提到相隔約6年再與霆鋒合作，他認為雙方都成熟了：「喺片場我哋乜都傾嘅，不過以前集中講工作，依家就會傾吓點做人，好似我哋會討論，大家捱咗十幾年，係咪應該留啲時間去享受人生呢？」

真情演活「木咀輝」

問到拍攝有何困難時，郭導竟搞笑說：「我問過啲消防員朋友，原來煙先係佢哋最大嘅敵人，所以我想拍『煙』多過拍『火』。我喺片場放煙，但原來『煙』嘅感覺相當恐怖，搞到自己好似拍緊鬼片一樣！」談到角色創造問題，他說：「霆鋒以前啲戲出名眼神懾人，今次佢嘅角色城府深，我覺得一定唔能夠拍佢嘅眼神，所以借咗自己副眼鏡畀佢戴。而阿樂以前喺銀幕上係寡言嘅英俊小生，今次佢要將『木咀輝』嘅真性情演出嚟，相信大家都未見過。」